Թուրքիոյ նախագահ Էրտողան Փետրուար 5-ին յայտարարած է, թէ ինք եւ իր կինը վարակուած են պսակաձեւ ժահրի Օմիքրոն տարբերակով։ Ընկերային ցանցերու միջոցով կատարած յայտարարութեան մէջ, Էրտողան ըսած է, թէ թեթեւ նախանշաններ ունենալով՝ դիմած են քննութեան, որ դրական (վարակուած) յայտնուած է։

Թուրքիոյ նախագահը աւելցուցած է, թէ բաւական թեթեւ կ՚անցընեն հիւանդութիւնը եւ ինք աշխատանքները կը շարունակէ տունէն։ Ան նաեւ հայցած է ժողովուրդին աղօթքը։

Եթէ կան արագ ապաքինման բազմաթիւ մաղթանքներ (արտաքին ճակատի վրայ, անոնցմէ առաջինը հասած է Ուքրաինայի նախագահ Զելենսքիէն), լուրը եւ ընկերացող աղօթքի հայցը անմիջապէս հակազդելու մղած են Էրտողանի ընդդիմադիր բազմաթիւ անձնաւորութիւններ, ծանօթ խմբագրապետէ մը մինչեւ Թուրքիան միջազգային մրցումներու ներկայացուցած ծանօթ լուղորդ մը, եւ ուրիշներ, ինչ որ բուռն զայրոյթ պատճառած է իշխանամէտ (իմա՝ էրտողանամէտ) մամուլին։ Այսպէս, «Քարար» թերթի խմբագրապետուհի Էօզկէ Քար Էրտողանի գրառումին պատասխանած է «Օ՛ն, եթէ Աստուած ուզէ…» («Հատի, ինշալլահ…») գրառումով։ Իսկ տարիներով Թուրքիոյ ազգային հաւաքականին մաս կազմած լուղորդ Տերիա Պիւյիւքունճու ալ Էրտողանի գրառումին պատասխանած է. «Պսակաձեւ ժահրով վարակուեր է եւ մեր աղօթքը կը հայցէ։ Կ՚ընենք, կ՚ընենք. անհոգ թող ըլլայ։ Քսան կաթսայ հելվա պատրաստելու սկսայ։ Երբ ժամանակը հասնի, պիտի բաժնեմ ամբողջ թաղին»։ Նշենք, որ Թուրքիոյ մէջ սովորութիւն է ննջեցեալներու հոգւոյն՝ կորկոտով պատրաստուած հելվայի բաշխումը։