Պոլսոյ Հայոց պատրիարք Սահակ արքեպիսկոպոս Մաշալեան 20 տարի դադարէ յետոյ պատարագ մատուցած է Մարտինի Տերիք գաւառը գտնուող 372-ամեայ հայկական Սուրբ Գէորգ եկեղեցւոյ մէջ։
Քալէ թաղի Սուրբ Գէորգ եկեղեցին կառուցուած է 1650-ին։ 1915-ի Հայոց ցեղասպանութենէն ետք, սրբատեղին յանձնուած է պետական գանձարանին, տարիներ շարունակ օգտագործուելով այլ նպատակներով։ Շրջանի Հայութեան թիւի բազմացման զուգահեռ, 1957-ին եկեղեցին վաճառուած է հայկական համայնքին։
Եկեղեցին վերջին անգամ վերանորոգուած է 2004-ին։ Շուրջ 20 տարի, սակայն, այնտեղ պատարագ չէ մատուցուած։ Գաւառին մէջ այժմ գրեթէ Հայեր չեն բնակիր։
Սուրբ Գէորգ հայկական եկեղեցւոյ մէջ մատուցուած պատարագին մասնակցած են գաւառը գտնուող երկու հայ ընտանիքներ եւ որոշ Հայեր, որոնք եկած են Տիգրանակերտէն, Պոլսէն, Անգարայէն, Իզմիրէն եւ Թուրքիոյ այլ վայրերէն։
Պատրիարք հայրը պատարագէն ետք եկեղեցւոյ պահպանման եւ խնամքին համար շնորհակալութիւն յայտնած է գաւառապետին։ Ան ընդգծած է, որ հայ ժողովուրդը տարբեր պատճառներով ստիպուած եղած է արտագաղթել, սփռուիլ աշխարհի տարբեր կողմերը եւ առ այդ հայկական շատ եկեղեցիներ մնացած են առանց իրենց տէրերուն։
Մաշալեան պատրիաք հայրը գոհունակութիւն յայտնած է Աստծոյ, որ Տերիքի Սուրբ Գէորգ եկեղեցին չէ փակուած, քանի որ միշտ եղած են եւ կան մարդիկ, որոնք հոգ տարած են անոր բարօրութեան։
