Երկու կողմէն ալ կան մեռեալներ եւ հարիւրաւոր վիրաւորներ

Իրան եւ Իսրայէլ կը շարունակեն փոխադարձ հարուածները, որոնք կը սպառնան ամբողջ տարածաշրջանը ներքաշել լայնածաւալ պատերազմի մէջ։ Քանի մը օր առաջ սկսած բախումներուն պատճառով Իրան արդէն  քաշուած է ԱՄՆ-ու հետ Օմանի մէջ նախատեսուած բանակցութիւններէն։

Իրանի զանազան քաղաքներուն մէջ բազմահազար քաղաքացիներ ցոյցեր կազմակերպած են «մա՛հ Իսրայէլին» եւ «վրէժ» վանկարկելով։

Յունիս 14-ի գիշերը Թեհրան հարուածած է Իսրայէլի կեդրոնական եւ հիւսիսային շրջանները. ըստ զանազան աղբիւրներու կան տասնեակ մը  մեռեալներ եւ հարիւրէ աւելի վիրաւորներ։ Հայֆայի մէջ վնաս կրած են քարիւղի խողովակաշարեր։

Իսրայէլ ալ հարուած հասցուցած է Իրանի հիւլէական կառոյցներուն։ Վնասուած է նաեւ Թեհրան գտնուող ամէնէն մեծ՝ Շահրանի քարիւղամբարը։ Վարչապետ Նեթանիահու յայտարարած է, թէ ռազմական գործողութիւնները երկար ատեն պիտի շարունակուին։ Իսրայէլի բանակը Յունիս 15-ին հեռանալու հրահանգ տուած էր Իրանի հիւլէական կառոյցներուն շուրջ ապրող բնակչութեան։

Իսրայէլական յարձակումներն ալ, ըստ իրանական աղբիւրներու՝ քաղաքացիական շրջանակներու մէջ պատճառած են 100-ի մօտ մեռեալներ եւ բազմահարիւր վիրաւորներ։