Իրանի «Azad» իսլամական համալսարանի Թեհրանի կեդրոնական մասնաճիւղը յայտարարած է, թէ հոն բացուած է Հայոց լեզուի եւ գրականութեան բաժին, իսկ դիմողները կ՚ընդունուին առանց մուտքի քննութեան։

Յուլիս 24-ին Իրանի Ազգային հետազօտական հիմնարկի տնօրէն Էքպեր Պապայի հաղորդած էր, որ Իրանի Սահմանադրութեան 15-րդ յօդուածին համաձայն՝ մի՛այն Հայերը իրաւունք ունին իրենց մայրենի լեզուով կրթութիւն ստանալու։ Ան նաեւ աւելցուցած էր, որ վերոյիշեալ յօդուածին մէջ տեղական լեզուներու ուսուցման վերաբերեալ գրառումը սխալ ընկալուած է եւ ան կը վերաբերի ոչ թէ Թուրքերուն այլ մի՛այն Հայերուն։

Այս լուրը թրքական մամուլին մէջ դժգոհութեան ալիք բարձրացուցած է եւ մեկնաբանուած հետեւեալ ձեւով. «Իրան, Ազերիներուն եւ հարաւը բնակող ղաշղայի (*) Թուրքերուն չ՚արտօներ սեփական լեզուով կրթութիւն ստանալ, մինչ “Azad” իսլամական համալսարանին մէջ Հայոց լեզուի եւ գրականութեան բաժին կը բանայ»։ Նաեւ՝ ըստ թուրք մամուլի գնահատման՝ հայ-իրանական մերձեցումը ուղղուած է Ազերպայճանի դէմ։

Իրանագէտ Վարդան Ոսկանեան Usanogh.am-ի հետ զրոյցին այս կապակցութեամբ նշած է, թէ Թուրքիոյ անդրադարձը կեղծաւորութեան դրսեւորում է. «Այդ նոյն Թուրքիոյ մէջ, յատկապէս պատմական Հայաստանի տարածքին` Իգդիրի շրջանը կ՚ապրին Ազերպայճանցիներ, բայց Թուրքիոյ մէջ ազերպայճաներէն չի դասաւանդուիր»,– դիտել տուած է ան եւ աւելցուցած, թէ բացի «Azad» իսլամական համալսարանէն, աւանդաբար հայերէն կը դասաւանդուի Սպահանի հայագիտական կեդրոնին մէջ, ինչպէս նաեւ համաձայնութիւն գոյացած է Երեւանի եւ Թաւրիզի պետական համալսարաններուն միջեւ, որպէսզի Թաւրիզի մէջ ալ սկսի գործել Հայագիտական հետազօտութիւններու կեդրոն մը։

(*) – Թրքական ծագում ունեցող ղաշղայիները թրքերէն կը խօսին։ Ղաշղայի ցեղը հեռաւոր անցեալէն ներկայ եղած է Ֆարս նահանգի եւ Իրանի հարաւային շրջանին մէջ։