Իրանի Արտաքին գործոց նախարարութեան բանբեր Նասեր Քանաանի կոչ ըրած է ազերպայճանական իշխանութիւններուն բացատրութիւն տալու վերջին հակաիրանական յայտարարութեան վերաբերեալ։
Ըստ mehrnews.com-ի, Քանաանի Մարտ 31-ին արձագանգած է Իսրայէլի Արտաքին գործոց նախարարի յայտարարութիւններուն՝ Ազերպայճանի իր պաշտօնակից Ճեյհուն Պայրամովի հետ «Իրանի դէմ միասնական ճակատ կազմելու» շուրջ համաձայնութեան յանգելու առնչութեամբ։
Քանաանի նշած է, թէ այս քայլը կրկին կը դրսեւորէ Իսրայէլի վարչակարգին չարամտութիւնը, որ կ՚ուզէ Ազերպայճանի հողը Իրանի Իսլամական Հանրապետութեան ազգային անվտանգութեան սպառնալիքի վերածել։
Ան ըսած է, թէ Թեհրան կ՚ակնկալէ, որ Ազերպայճանի կառավարութիւնը խուսափի երկու բարեկամ ժողովուրդներու՝ թշնամիներուն ծուղակը իյնալէ։ Ընդգծելով Իրանի եւ Ազերպայճանի միջեւ պատմական և կրօնական ամուր կապերը՝ Քանանի շեշտած է, թէ Իրան չի կրնար անտարբեր մնալ Ազերպայճանի տարածքէն իր դէմ Իսրայէլի վարչակարգի դաւադրութեան եւ սպառնալիքին նկատմամբ:
Նշենք, թէ Հաճիզատէ նոյն օրը անմիջապէս արձագանգելով Քանանիի յայտարարութիւններուն ըսած է, թէ «իրանական կողմէն հնչած սոյն սպառնալիքները չեն կրնար վախցնել Ազերպայճանը»։
