Մայիս 8-ին, Ատրպատականի Հայոց թեմի առաջնորդ՝ Գրիգոր արք. Չիֆթճեան, ազգային առաջնորդարանի «Էմիլ Յակոբեան» դահլիճին մէջ ընդունած է Հայաստանի տարբեր շրջաններէն (Երեւան, Աշտարակ, Սեւան, Սիսիան եւ Կապան) ժամանած տասը գեղանկարիչ, քանդակագործ արուեստագէտներ, որոնք Իրան-Հայաստան յարաբերութեանց յանձնաժողովի եւ Թաւրիզի Արուեստից համալսարանի տնօրէնութեան հրաւէրով Թաւրիզ ժամանած են՝ մասնակցելու համալսարանին մէջ կազմակերպուած ցուցահանդէսին։
Սրբազան Հայրը ողջունած է հայրենի շնորհալի վարպետները եւ անոնց ուղեկցող պետական պատասխանատուները, կարեւոր համարելով Իրան-Հայաստան կապերու սերտացումը, փոխադարձ այցելութիւններով, եւ այս փուլին արուեստի մակարդակով։ “Դարերու դրացնութիւնը հասարակաց բազմաթիւ պատկերներ դրոշմած են մեր միտքերուն եւ հոգիներուն մէջ, որոնք դիւրաւ չեն ջնջուիր մեր զոյգ ժողովուրդներու հաւաքական յիշողութենէն”,– յայտնած է Սրբազան հայրը:
Հրաժեշտ տալէ առաջ, հիւրերը այցելած են առաջնորդարանի հնատիպերու բաժանմունքը եւ «Ռոստոմ-Գասպար» գրադարանը, մօտէն ծանօթանալով թեմի մշակութային հարստութիւններուն:
Իսկ Մայիս 10-ին, Համալսարանի տնօրէնութեան առաջնորդութեամբ, Սրբազան հայրը եւ թեմական խորհուրդի անդամները այցելած են ցուցահանդէսին սրահը, ծանօթանալով հայրենի արուեստագէտներու բարձրորակ գործերուն։ Անոնցմէ ոմանք տեղւոյն վրայ կը ստեղծագործէին, մեծ հիացում պատճառելով համալսարանի ուսանողութեան եւ բոլոր այցելուներուն։
Այնուհետեւ առաջնորդարանի պատուիրակութիւնը այցելած է համալսարանի թանգարանը եւ շէնքին հնագոյն մասը, ուր տակաւին կը պահպանուին Թաւրիզի նախկին կաշեգործատան գործիքները: Յայտնենք, որ համալսարանի այս հին բաժինը հայապատկան կաշեգործատուն եղած է, ուր անցեալին մեծ թիւով Հայեր աշխատած են:
