Մարտ 24-ին Հայաստանի ֆութպոլի հաւաքականը ԻՒԷՖԱ-ի Եւրօ-2024-ի ընտրական մրցաշարքը կը սկսի Թուրքիոյ դէմ խաղով։

Իսկ ԻՒԷՖԱ-ի յատուկ որոշումով՝ հանդիպումին ներկայ պիտի չկարենան ըլլալ հիւրերու երկրպագուները՝ մեկնելով անվտանգութեան նկատառումներէ։

Հայաստանի Ֆութպոլի դաշնակցութիւնը Երեքշաբթի հաստատած է, որ ԻՒԷՖԱ-ն իրեն հրահանգած է տոմս չվաճառել թուրք երկրպագուներուն՝ խաղի ընթացքին «անտեղի լարումէ» խուսափելու համար։ Հայ երկրպագուներուն նոյնպէս պիտի արգիլուի ներկայ գտնուիլ Սեպտեմբերին Թուրքիոյ մէջ տեղի ունենալիք դարձի մրցումին։

Հայաստանի Ֆութպոլի դաշնակցութեան բանբերը «Ազատութիւն» ձայնասփիւռին հետ զրոյցին ըսած է, որ ԻՒԷՖԱ-ն այդ արգելքները ի՛նք սահմանած է, ինքնաբերաբար։ Ո՛չ Հայաստանի, ո՛չ ալ Թուրքիոյ ֆութպոլի դաշնակցութիւնը անկէ խնդրած է նման միջոց։

Հանդիպումը կը կայանայ Երեւանի «Հանրապետական» մարզադաշտը։

Կը թուի, թէ մեծ պիտի ըլլայ այս մրցումին նկատմամբ հետաքրքրութիւնը, այնպէս որ սահմանուած է մէկ անձի համար միայն երկու տոմսի իրաւունք:

Վերջին անգամ Հայաստան ու Թուրքիա իրարու հետ ֆութպոլի մրցում ունեցած էին 2008-ին: Այդ խաղին ներկայ եղած էր Թուրքիոյ այն ժամանակուան նախագահ Ապտուլլահ Կիւլ եւ թուրք երկրպագուներու փոքր խումբ մը:

Կիւլի այցը Հայաստանի մայրաքաղաք սկիզբ դրած էր երկու ժողովուրդներու միջեւ մերձեցման գործընթացի մը։ Այնուհետեւ Հայաստանի նախագահ Սերժ Սարգսեան տարի մը ետք գացած էր Թուրքիա՝ դիտելու երկու խումբերու երկրորդ խաղը։ Ատով ալ, այս ժամանակաշրջանը պիտի բնութագրուէր «ֆութպոլային քաղաքականութեան» շրջան։