«Ասպարէզ» – Արեւմտեան Ամերիկայի Հայ դատի յանձնախումբը անցեալ շաբաթավերջին տեղի ունեցած իր խորհրդաժողովով եւ տարեկան ձեռնարկով ի մի բերաւ համայնքը, որուն ներկայացուցիչները վերանորոգեցին Հայկական Հարցին ի նպաստ պայքարելու իրենց նուիրումը։

Տարեկան ձեռնարկին, Հայ դատի յանձնախումբի ատենապետ իրաւաբան Նորա Յովսէփեան յայտարարեց, թէ կազմակերպութեան գործունէութեան զարկ տալու նպատակով, համակիրներէն եւ բարերարներէն կարելի եղած է գոյացնել 1,1 միլիոն տոլար գումար մը, ինչպէս նաեւ անակնկալ նուիրատւութիւններ՝ «Խոստումը» հիմնարկի վարիչ Էրիք Էսրայէլեանէն եւ անոր հետ «Համաշխարհային ազդեցութիւն» մրցանակը կիսած Քիմ Քարտաշեանէն։

«Շերըթըն Եունիվըրսըլ»-ի մէջ, Սեպտեմբեր 24-ին տեղի ունեցած խորհրդաժողովին իրենց մասնակցութիւնը բերին առաւել քան 500 անձեր։ Խորհրդաժողովը նուիրուած էր Արցախին եւ անոր մասնակցողներու շարքին էին Արցախի Արտաքին գործոց նախարար Դաւիթ Բաբայեան, որ մանրամասնօրէն ներկայացուց Արցախի ներկայ իրավիճակը։

Իրենց կարգին, Արցախի Մշակոյթի փոխնախարար Լեռնիկ Յովհաննիսեան եւ փրոֆ. Մաշինքա Ֆիրունց Յակոբեան մասնակցեցան Արցախի յուշակոթողներուն նուիրուած քննարկումին, որ համադրուեցաւ այդ ոլորտի մասնագէտ Սիմոն Մաղաքեանի կողմէ։

Աւելի ուշ, Հայաստանի մարդկային իրաւանց նախկին պաշտպան Արման Թաթոյեան մանրամասնօրէն ներկայացուց Հայաստանի եւ Արցախի դէմ Ազերպայճանի մարդկային իրաւանց ոտնակոխումները, որոնք պատերազմական ոճիրներու մակարդակին կը հասնին։ 

Միջազգային դատարաններու մէջ հայութեան շահերը պաշտպանելու աշխատանքին նուիրուած քննարկումին իրենց մասնակցութիւնը բերին մասնագէտներ Եղիշէ Կիրակոսեան, Լեւոն Գէորգեան եւ Գառնիկ Քերքոնեան։

Սարգիս եւ Նունէ Սեփեթճեանի առատաձեռն նուիրատուութեամբ իրականացած խորհրդաժողովին ներկայ եղան նաեւ Ալեք Փիլիպոս Ազգային վարժարանէն առաւել քան 100 աշակերտներ։

Իսկ Սեպտեմբեր 25-ին, առաւել քան 800 համայնքային գործիչներ իրենց մասնակցութիւնը բերին «Պեվըրլի Հիլթըն»-ի մէջ տեղի ունեցած Հայ դատի տարեկան ձեռնարկին, որ համաճարակին պատճառով տեղի չէր ունեցած 2019-էն ի վեր։

«Կեանքի մը իրագործումներ» մրցանակը ստացաւ Գոնկրէսի Հայկական համախմբումի համաատենապետ Ճեքի Սփիր, որ իբրեւ Գոնկրէսի հայազգի երկու անդամներէն մէկը, հայութեան շահերու անխոնջ պաշտպաններէն է եւ դեռ անցեալ շաբաթ Ներկայացուցիչներու տան նախագահուհի Նենսի Փելոզիի հետ Հայաստան այցելեց, ականատես դարձաւ Ազերպայճանի բարբարոսութիւններու հետեւանքներուն։ Ան ձեռնարկէն անմիջապէս առաջ տրուած մամլոյ ասուլիսին յայտարարեց, թէ Գոնկրէսին ներկայացուցած է Հայաստանի եւ Արցախի դէմ Ազերպայճանի պատերազմական ոճիրները դատապարտող բանաձեւ մը, որ նաեւ Ուաշինկթընէն կը պահանջէ պատիժներ որդեգրել Պաքուի դէմ, իսկ միջազգային ատեաններէն՝ հետապնդել նշեալ ոճիրները։