Ստեփանակերտի Թումօ ստեղծարար արհեստագիտութիւններու կեդրոնը կը մշակէ նոր ծրագրեր։ «Արցախփրէս»-ի թղթակցին հետ զրոյցին, Արցախեան գրասենեակի ղեկավար Խաչատուր Հայրապետեան տեղեկացուցած է, որ Յուլիսին կը կազմակերպեն աշխատանոցներ, որոնց ընթացքին ուսանողները կը սորվին ստեղծել նուագող մարդամեքենաներ (robot)։
Անդրադառնալով շրջափակման հետեւանքով գոյացած առկայ խնդիրներուն՝ ան նշած է, որ երթեւեկութեան միջոցներու վառելիքի սղութեան պատճառով ուսանողները Հանրապետութեան շրջաններէն մայրաքաղաք հասնելու դժուարութիւններ ունին եւ զրկուած են դասընթացքներուն մասնակցելու կարելիութենէն։ Ելեկտրականութեան պարբերական խզումները եւս խոչընդոտներ կը յարուցեն։
“Շարք մը հարցեր կը լուծենք արհեստագիտութեան ընձեռած միջոցներով, օրինակ՝ դասերը առցանց կազմակերպելով”,– ըսած է Հայրապետեան, գոհունակութեամբ հաղորդելով որ շրջափակման ընթացքին Թումօ յաճախողներու թիւը աւելցած է։
“Վաղուհասը, Շահմասուրը, Խրամորթը, Սպիտակաշէնը, Նորշէնը այն համայնքներն են, ուրկէ շրջափակման ընթացքին ուսանողներ արձանագրուած են”,– նշած է ան աւելցնելով որ Գետաւանի եւ Կարմիր Շուկայի մէջ կը նախատեսուին նոր Թումօ-տուփեր տեղադրելու ծրագրեր, եթէ երթեւեկի եւ անհրաժեշտ այլ միջոցներու խնդիրները լուծում գտնեն:
