Հայաստանի մէջ Ռուսաստանի դեսպան Սերկեյ Քոփիրքին յայտարարած է, թէ իր կարծիքով շատերու համար շատոնց յայտնի է, որ Ուքրաինայի մէջ ստեղծուած ողբերգական կացութիւնը Ռուսաստան-Արեւմուտք բազմադարեայ քաղաքական դիմակայութեան շարունակութիւնն է եւ անոր ուղղակի հետեւանքը:
“Նափոլէոնին եւ Հիթլերին նմանակողները տարուած են նախորդ պարտութիւններու համար վրէժխնդրութեան հասնելու գաղափարով եւ ակներեւ է, որ ներկայ պատերազմի գլխաւոր հրահրողները եւրոպական պետութիւններն են՝ նախ եւ առաջ Մեծն Բրիտանիան, Ֆրանսան եւ Գերմանիան, որոնք, ըստ երեւոյթին չեն սորված անցեալի դասերը”,– ընդգծած է ան, աւելցնելով հետեւեալը.
“2014-ին Արեւմուտքը իր իսկ կազմակերպած պետական յեղաշրջման հետեւանքով Ուքրաինայի մէջ իշխանութեան բերած է հակաժողովրդական, նորնացիստական վարչակարգ մը, որուն նպատակն է Ռուսաստանի դէմ պայքարը: Ուքրաինայի օրինակը յստակ ցոյց կու տայ՝ ինչ կրնայ պատահիլ երկրի մը, որ ճակատագրի բերումով գտնուելով Ռուսաստան-Արեւմուտք աշխարհաքաղաքական դիմակայութեան սահմանին, կը դադրի հետեւելէ ազգային շահերուն եւ Արեւմուտքին թոյլ կու տայ զինք վերածել ապակառուցողական աշխարհաքաղաքական բեմագրութիւններու իրագործման գործիքի”։
***
Մէկ խօսքով՝ մեր մեծ մայրերուն այնքան սիրելի ռամկական ասացուածքով՝ «Աղջի՛կս, քեզի կ՚ըսեմ, հա՛րսս, դուն հասկցիր»։
Ռուսերը, ա՛նկասկած, ունին բազմաթիւ արժանիքներ։ Բայց եթէ կայ հատ մը, զոր ոչ ոք կրնայ ուրանալ, սպառնալիքներ բանաձեւելու անոնց հանճարեղ կարողութիւնն է։
© 2023 Բոլոր իրաւունքները վերապահուած են։
