Երեւանի մէջ տեղի ունեցած «Տեղեկատուական արհեստագիտութիւններու ոլորտի ներդրողներու օրը» միջոցառման ընթացքին, Ազգային ժողովի փոխնախագահ Յակոբ Արշակեան յայտարարած է, թէ 2022-ին Հայաստանի պատմութեան մէջ առաջին անգամ ըլլալով բարձր արհեստագիտական արդիւնաբերութեան ոլորտին մէջ արձանագրուած է աւելի քան 1 միլիառ տոլարի շրջանառութիւն։ 

Ան նաեւ ըսած է, որ նշեալ ոլորտին մէջ աշխատողներու թիւը առաջին անգամ ըլլալով գերազանցած է 40 հազարը։

Անդրադառնալով «Entreprise Armenia» ներդրումային աջակցութեան կեդրոնի գործունէութեան՝ Ազգային ժողովի փոխնախագահը ընդգծած է կառոյցին աջակցութիւնը երկրին մէջ ներդրողներուն աջակցելու գործին մէջ։ “Մենք կ՚ողջունենք միջազգային ընկերութիւններու մուտքը Հայաստան, ինչ որ կը նպաստէ նմանատիպ հայկական ընկերութիւններու ստեղծումին”,– ըսած է Յակոբ Արշակեան։

Բանախօսը անդրադարձած է գիտութեան ոլորտին ուղղուած գանձատրման յաւելման՝ նշելով, որ ան 2022-ին կազմած է աւելի քան 30 միլիառ դրամ։

Արշակեան կոչ ըրած է համախմբելու ուժերը՝ բարձրակարգ մասնագէտներ պատրաստելու համար՝ փոփոխուող եւ զարգացող աշխարհաքաղաքական միջավայրին մէջ առկայ մարտահրաւէրները յաղթահարելու համար։

Միջոցառման ընթացքում ելոյթ ունեցած են փոխվարչապետ Տիգրան Խաչատրեան, Բարձր արհեստագիտական արդիւնաբերութեան նախարար Ռոբերտ Խաչատրեան, «Entreprise Armenia» ներդրումային աջակցութեան կեդրոնի գլխաւոր տնօրէն Լեւոն Օհաննէսեան, Հայաստանի մէջ ԱՄՆ-ու դեսպան Քրիսթինա Քվիէն։ Անոնք անդրադարձած են ոլորտի խնդիրներուն եւ նախանշած լուծման ուղիները՝ ըստ իրենց։

Ոլորտի զարգացման տեսանկիւնէն կարեւոր համարուած է գործարարական հատուածի եւ պետական կառոյցներու արդիւնաւէտ համագործակցութիւնը։ Ընդգծուած է ոլորտի նոր մասնագէտներու պատրաստութեան անհրաժեշտութիւնը, շեշտը դրուած է տեղեկատուական արհեստագիտութիւններու ոլորտի ընկերութիւններու գործունէութեան պայմաններու բարելաւման ուղղուած բարեփոխումներու կարեւորութեան վրայ։

Այնուհետեւ կլոր սեղաններու ձեւաչափով անդրադարձ կատարուած է ոլորտին մէջ Հայաստանի աշխատուժին, որոշ մասնագիտութիւններու գծով կրթութեան որակին, ինչպէս նաեւ տուեալներու պաշտպանութեան ընդհանուր կանոնակարգերու կիրարկման։