Հայ շարժարուեստի 100-ամեակին եւ Հայկական կենդանապատկեր ֆիլմերու 85-ամեակին առթիւ Հայաստանի Ազգային կինոկենտրոնը շարժարուեստի մեր ժառանգութիւնը պիտի ներկայացնէ միջազգային հարթակներու վրայ:
«Արմէնփրէս»-ի համաձայն՝ Դեկտեմբեր 28-ին լրագրողներու հետ հանդիպումին՝ Կինոկենտրոնի տնօրէնուհի Շուշանիկ Միրզախանեան ըսած է, որ երկու տարի է մեծ աշխատանք կը տարուի արտասահմանի մէջ յոբելինական ձեռնարկներ կազմակերպելու համար:
Նախնական համաձայնութիւններով՝ միջազգային հարթակներու վրայ պիտի ներկայացուի «Հայ կինօ-100» ծրագիրը: Փետրուարին այս ծրագիրը պիտի ընդգրկուի Իրանի «Ֆաճր» շարժարուեստի փառատօնին մէջ: “Մենք մասնակցելու ենք նաեւ Պերլինի կինոշուկային: Ներկայացնելու ենք ժամանակակից կինօն, սակայն կինոշուկայում Հայաստանի տաղաւարը ձեւաւորուելու է «Հայ կինօ-100» գաղափարի հիման վրայ: Մարտին հայկական կինօն կը ներկայացուի Փարիզի Սինեմատեկում: Յաջորդը կը լինի Կաննի հեղինակաւոր փառատօնը, որը մեզ համար շատ լուրջ հարթակ է: 2022-ին մեծ աշխատանք ենք կատարել այնտեղ: Ըստ նախնական պայմանաւորուածութեան՝ վերականգնելու, թուայնացնելու ենք Ֆրունզէ Դովլաթեանի «Բարե՛ւ, ես եմ» ֆիլմը, որը ցուցադրելու ենք «Կաննի դասականներ» բաժնում: Այն 1966 թուականին որպէս խորհրդային ֆիլմ ընդգրկուած է եղել Կաննի կինոփառատօնի մրցութային ծրագրում: Այս անգամ կը ցուցադրուի որպէս հայկական կինօ”,- շեշտած է Միրզախանեան:
Ըստ անոր՝ հայկական ֆիլմերու հանդէպ հետաքրքրութիւնը մեծ է տարբեր երկրներու մէջ, ինչ որ նա՛եւ Կինոկենտրոնի՝ վերջին տարիներուն տարած լայնածաւալ աշխատանքին արդիւնքն է: “Կան երկրներ, որոնք յաճախ առաջին անգամ են լսում հայկական կինոյի մասին, կան երկրներ, որոնք զարմանում են, որ մենք ունենք համր ֆիլմեր, որոնք կարողացել ենք պահպանել: Մենք հասանելի ենք դարձրել մեր կինօն, եւ այսօր ԱՄՆ-ից սկսած, եւրոպական մի շարք երկրներով աւարտուած հետաքրքրւում են հայկական ֆիլմարտադրութեամբ”,-ընդգծած է Կինոկենտրոնի տնօրէնուհին:
Միրզախանեան նաեւ բացատրած է, որ մէկ օր առաջ Հնդկաստանի գործընկերներէն ստացած է նամակ մը, ուր կ՚ըսուէր, թէ պատրաստ են հայկական ֆիլմի վերականգնողական աշխատանքներ անվճար կատարելու: Ան աւելցուցած է, որ եթէ Կինոկենտրոնը հաւնի կատարուած աշխատանքը, կարելի է համագործակցութիւն նախատեսել այս ուղղութեամբ։
