Թիֆլիսահայութեան շրջանակին մէջ աւանդական «Հարիսայի փառատօնը», որ սովորաբար կը նշուէր  Բուն Բարեկենդանի տօնին, այս տարի տեղի ունեցած է շաբաթ մը առաջ՝ Փետրուար 12-ին։

Վիրահայոց թեմի Հաւլաբարի Սուրբ Էջմիածին եկեղեցւոյ մէջ մատուցուած կիրակնօրեայ  պատարագէն յետոյ, հաւատացեալները համախմբուած են «Հայարտուն» կեդրոնը՝ մասնակցելու «Հարիսա-2023» փառատօնին, կազմակերպուած՝ Վրաստանի հայ կանանց «Շուշանիկ» միութեան, «Սուրբ Գէորգ» եկեղեցասէր կիներու միութեան  եւ թեմի «Հայարտուն» կեդրոնին կողմէ:

Հարիսայի փառատօնին մասնակցած են Թիֆլիսի հայ համայնքի գրեթէ բոլոր կառոյցները։ Կեդրոնի «Գալուստ Կիւլպէնկեան» սրահին երկայնքով սեղաններուն վրայ շարուած են շուրջ երեսուն իւղալի հարիսայով կաթսաներ: Ձեռնարկին մասնակցած են Վիրահայոց թեմի առաջնորդ Կիրակոս վրդ. Դաւթեան,  Սամցխէ-Ջաւախքի առաջնորդական փոխանորդ Նշան վրդ. Հմայեակեան, իսկ պատուոյ հիւրերը եղած են Վրաստանի մէջ Հայաստանի հիւպատոսութեան դիւանագէտները։

Վիրահայոց թեմի առաջնորդը բարձր գնահատած է կիներու եւ համայնքային կառոյցներու մասնակցութիւնը հարիսայի փառատօնին, արժեւորած հայ մշակոյթին մաս կազմող հայկական աւանդական կերակրատեսակները պահպանելու եւ սերունդներուն փոխանցելու վիրահայութեան շրջանակին մէջ հաստատուած աւանդութիւնը: Թեմակալ առաջնորդը հարիսայի կաթսաները օրհնելէ ետք ներկաները հրաւիրած է ճաշակելու այս համեղ կերակրատեսակը:

Այնուհետեւ հնչած է ուրախ երգն ու երաժշտութիւնը։ Այս տարի շուրջ եօթը հարիւր հոգի համտեսած է օրհնուած հարիսան, նաեւ ան բաժնուած է շրջանի հիւանդներուն ու տարեցներուն, որոնք ի վիճակի չեն եղած ներկայ գտնուելու տօնահանդէսին։