ՀՀ Արտաքին գործոց նախարարութեան մամլոյ քարտուղար Վահան Յունանեան ստորեւ տրուած յայտարարութիւնը հրապարակած է՝ ազէրպայճանական բանակին կողմէ Շուշիի Սուրբ Ամենափրկիչ Ղազանչեցոց Մայր տաճարի կրկնակի ռմբակոծման տարելիցին կապակցութեամբ.-
«2020-ի Հոկտեմբերի 8-ին Արցախի և նրա ժողովրդի դէմ սանձազերծուած ռազմական նախայարձակման ընթացքում Ադրբեջանի զինուած ուժերը գերճշգրիտ զինատեսակներով կրկնակի օդային հարուածներ հասցրեցին Շուշիի Սուրբ Ամենափրկիչ Ղազանչեցոց Մայր տաճարին՝ վերջինիս պատճառելով զգալի աւերածութիւններ: Նոյեմբերի 9-ի եռակողմ յայտարարութիւնից հաշուած օրեր անց նոյն եկեղեցին ենթարկուեց վանդալիզմի և սրբապղծման։ Շուշիի Մայր տաճարի ֆիզիքական վնասման զուգահեռ Ադրբեջանը չի դադարում փորձերը` խեղաթիւրելու եկեղեցու հայկական ինքնութիւնը, որն իրականացւում է վերանորոգման պատրուակով եկեղեցու ճարտարապետական տեսքի փոփոխման միջոցով:
Պաշտամունքի վայրի կրկնակի դիտաւորեալ հրիթառակոծումը ոչ միայն միջազգային իրաւունքով, մասնաւորապէս՝ «Զինուած ընդհարման դէպքում մշակութային արժէքների պաշտպանութեան մասին» Լա Հէյի 1954 թուականի համաձայնագրով և դրան կից երկրորդ արձանագրութեամբ (1999 թ.) դատապարտելի յանցագործութիւն է, այլ նաև մտադրութիւնների խորհրդանշական բացայայտում․ այն Արցախի տարածքում հայկական ներկայութեան ցանկացած հետքի բնաջնջմանն ուղղուած Ադրբեջանի քաղաքականութեան ակնյայտ դրսևորում է:
Ադրբեջանի կողմից Արցախի դէմ սանձազերծուած նախայարձակումից մէկ տարի անց Արցախի՝ ադրբեջանական վերահսկողութեան տակ յայտնուած տարածքներում գտնուող շուրջ 1500 պատմամշակութային ժառանգութեան և պաշտամունքի վայրերի, ինչպէս նաև հազարաւոր թանգարանային նմուշների ճակատագիրը շարունակում է մնալ անորոշ և վտանգուած:
Բազմաթիւ են ադրբեջանական զինուած ուժերի կողմից հայկական եկեղեցիների, մշակութային և կրօնական այլ յուշարձանների միտումնաւոր ոչնչացման և վանդալիզմի փաստագրուած դէպքերը։ Բացի այդ, դրանց ֆիզիքական ոչնչացման հետ մէկտեղ ականատես ենք լինում Ադրբեջանի կողմից հետևողական կերպով իրականացուող պատմական փաստերի կեղծմանը և հայկական յուշարձանների ինքնութեան խեղաթիւրմանը:
Այս համածիրում, թերևս, պատահական չէ, որ Ադրբեջանը շարունակում է արգելափակել կամ հնարաւորինս սահմանափակել ԻՒՆԷՍՔՕ-ի փորձագիտական առաքելութեան մուտքը դէպի վտանգուած հայկական մշակութային ժառանգութեան վայրեր` փորձելով կոծկել իր կողմից գործած պատերազմական յանցագործութիւնները:
Ժողովուրդների մշակութային ու հոգևոր ժառանգութիւն հանդիսացող պատմամշակութային յուշարձանների և պաշտամունքի վայրերի դէմ ուղղուած վայրագութիւնները կոպտօրէն խախտում են միջազգային իրաւունքը, հակասում են համամարդկային արժէքներին և խստագոյնս դատապարտելի են։
Շուշիի Մայր տաճարը Արցախում Հայ Առաքելական եկեղեցու կարևոր կենտրոններից է, և հայ եկեղեցու սպասաւորներն ու հետևորդները պէտք է անարգել մուտք ունենան այդ սրբատեղին»։
