Հաղորդագրութիւն

(2025 Յունիս 28)

«Մայր Աթոռ Սուրբ Էջմիածինը խստօրէն դատապարտում է Յունիս 28-ին Շիրակի թեմի առաջնորդ Տ. Միքայէլ արքեպիսկոպոս Աջապահեանի առնչութեամբ դատարանի կայացրած բանտարկութեան որոշումը, որ ուղղակի հետեւանքն էր վարչապետի եւ իշխանութեան բարձրաստիճան միւս պաշտօնեաների եկեղեցահալած քաղաքականութեան եւ եկեղեցականների դէմ թշնամանքի ու ատելութեան խօսքի։

Փաստերը վկայում են, որ քաղաքական որոշակի ուղղորդումով եւ ճնշման ներքոյ դատարանի կայացրած որոշումը անհիմն է եւ ապօրինի։

Միքայէլ արքեպիսկոպոսի դէմ ձեռնարկուած քայլերը ոչ այլ ինչ են, քան դասական իմաստով՝ քաղաքական հետապնդում եւ դրսեւորում անձնական վրէժխնդրութեան իրեն քրիստոնեայ եւ Հայ եկեղեցու զաւակ նկատող մի անձի, ով նախօրէին իրաւապահ մարմինների ուժերին հրահանգեց պաշարել Մայր Աթոռ Սուրբ Էջմիածինը՝ պախարակելի, աննախադէպ ոտնձգութիւն կատարելով համայն հայութեան հոգեւոր կենտրոնի, եկեղեցականների եւ հաւատաւոր ժողովրդի նկատմամբ։

Յորդորում ենք դատական համակարգին եւ պատկան մարմիններին գործել օրինականութեան դաշտում եւ անյապաղ ազատ արձակել Տ. Միքայէլ արքեպիսկոպոս Աջապահեանին»։