Հայաստանի Ֆրանսական համալսարանին մէջ (UFAR) Փետրուար 24-ին եւ 25-ին տեղի ունեցած է Կեդրոնական եւ Արեւելեան Եւրոպայի մէջ բարձրագոյն կրթութեան որակին նուիրուած ֆրանսախօս առաջին ֆորումը, որ կազմակերպուած է UFAR-ի նախաձեռնութեամբ եւ գործակցութեամբ՝ Ֆրանսախօսութեան համալսարանական գործակալութեան, ԻՒՆԷՍՔՕ-ի, ՀՀ Կրթութեան, գիտութեան, մշակոյթի եւ մարզանքի (ԿԳՄՄ) նախարարութեան։
Խորհրդաժողովի առաքելութիւնն էր լրացնել ԻՒՆԷՍՔՕ-ի, Ֆրանսախօսութեան համալսարանական գործակալութեան եւ անոնց գործընկերներուն կողմէ ֆրանսախօս տարածքի համալսարաններու կառավարման բարելաւման նպատակով ծաւալուող գործողութիւնները։
Խորհրդաժողովի բացումին ելոյթ ունեցած է ՀՀ ԿԳՄՄ նախարարի տեղակալ Արթուր Մարտիրոսեան, վստահեցնելով որ՝ միջհամալսարանական երկխօսութիւնը պիտի նպաստէ, թէ՛ Հայաստանի, թէ՛ ֆրանսախօս գործընկերներու համալսարաններու բարձրագոյն կրթութեան որակի բարձրացման։
Այս խորհրդաժողովին հիմնական նպատակներն էին.
– Աջակցիլ ԻՒՆԷՍՔՕ-ի եւ Ֆրանսախօսութեան համալսարանական գործակալութեան անդամ պետութիւններու բարձրագոյն ուսումնական հաստատութիւններու որակի ապահովման եւ համալսարաններու կառավարման հարցերուն։
– Ներկայացնել ու քննարկել բարձրագոյն կրթութեան որակի ապահովման տարբեր գործիքներ ու գործիքակազմեր (mécanismes)։
– Համալսարանի անձնակազմu վերապատրաստել համալսարանի կառավարման հմտութիւններու եւ որակի ապահովման ոլորտին մէջ։
– Կատարել լաւագոյն փորձառութեան ու տեղեկատւութեան փոխանակում եւ համալսարանական կառավարման ոլորտին մէջ գաղափարներու տարածում։
– Նպաստել Կեդրոնական եւ Արեւելեան Եւրոպայի երկիրներուն մէջ եւ անոնցմէ դուրս Ֆրանսախօսութեան համալսարանական գործակալութեան անդամ բարձրագոյն ուսումնական հաստատութիւններու միջեւ կապերու ամրապնդման` հասարակաց ծրագրերու իրագործման համար:
