Ամերիկացի գոնկրէսական Տինա Թայթըսի նախաձեռնութեամբ,– որուն միացած են գոնկրէսականներ Կաս Պիլիրաքիս, Թետ Լիու եւ Տէյվիտ Վալատաօ,– Ապրիլ 1-ին Գոնկրէսին ներկայացուած է Հայոց ցեղասպանութեան դասաւանդումի բանաձեւ մը։ Երկկուսակցական նախաձեռնութիւն մը, որ Գոնկրէսի գրադարանի ղեկավարութեան կը յանձնարարէ հանրային դպրոցներուն մէջ Հայոց ցեղասպանութեան եւ Օսմանեան կայսրութեան այլ փոքրամասնութիւններու դէմ սպանդներու մասին դասաւանդման ծրագրի կիրարկումը։ Լուրը կը հաղորդէ ԱՄՆ-ու Հայ դատի յանձնախումբը։

Բանաձեւին համաձայն՝ հինգ տարուան ընթացքին 10 միլիոն տոլար պիտի յատկացուի՝ աջակցելու համար կրթական նիւթերու զարգացման եւ տարածման, ուսուցիչներու պատրաստութեան, առցանց աղբիւրներու եւ ուսումնական ծրագրերու ներառման՝ ամերիկացի ուսանողներուն սորվեցնելու համար Հայոց ցեղասպանութեան պատճառները, հետեւանքները եւ մնայուն դասերը։

“Ուսանողներուն տրամադրելով անհրաժեշտ կրթական աղբիւրներ, բանաձեւը նպատակ ունի պայքարելու ցեղասպանութեան ժխտման դէմ՝ միաժամանակ յարգելով զոհերուն յիշատակը”,– շեշտած է Տինա Թայթըս։

“Մենք պէտք է ճանչնանք անցեալի անմարդկային արարքները, որպէսզի կարենանք զանոնք կանխել ապագային: Այս նպատակին հասնելու լաւագոյն միջոցներէն մէկը կրթութիւնն ու իրազեկումն է, եւ այս պատճառով հպարտ եմ, որ կրկին Հայոց ցեղասպանութեան կրթական օրինագծի համահեղինակն եմ”,– ընդգծած է գոնկրէսական Կաս Պիլիրաքիս։

“Հայոց ցեղասպանութիւնը պատճառ դարձաւ մէկ ու կէս միլիոնէ աւելի կեանքերու կորուստին Օսմանեան կայսրութեան ձեռքով եւ չափազանց կարեւոր է որ այս մութ էջը չմոռցուի”,– նշած է գոնկրէսական Տէյվիտ Վալատաօ:

“Թէեւ մենք չենք կրնար 110 տարի ետ երթալ կանխելու համար շուրջ 1,5 միլիոն հայերու անարդարանալի կոտորածը, բայց կրնանք կրթութիւնը օգտագործել՝ երաշխաւորելով որ զոհերը երբեք պիտի չմոռցուին: Այս ոճրագործութեան սարսափները մնայուն ազդեցութիւն գործած են Հայաստանի եւ անոր սփիւռքին վրայ: Հրամայական է որ գալիք սերունդները սորվին այս կոտորածին մասին, որպէսզի նման բան կրկին տեղի չունենայ”,– յայտարարած է գոնկրէսական Թետ Լիու: