Մարտ 11-ին, «Ապագայ հայկականը» նախաձեռնութեան համանախագահ Նուպար Աֆէեան լրագրողներու հետ զրոյցին, անդրադառնալով Արցախեան հիմնախնդրին յայտնած է, թէ կը յուսայ որ Արցախը կ՚ինքնորոշուի եւ Արցախցիները իրենք կ՚որոշեն իրենց ապագան։ “Այժմ անորոշ ապագան մեծապէս կը ճնշէ Արցախահայութեան առօրեայ կեանքին վրայ, որովհետեւ եթէ ապագայի նկատմամբ  վստահութիւն չըլլայ, ապա ընտանիքները կրնան մտահոգուիլ”:

Խօսելով «Ապագայ հայկականը» նախաձեռնութեան մասին, ան յոյս յայտնած է, որ համաժողովին իրատես ապագայ ունենալու վերաբերեալ նոր գաղափարներ կը ծնին, որոնց իրագործումով իրենք կը յառաջանան։

“Համաժողովը քաղաքացիական հաւաք է։ Հայութեան մէջ այնքան ալ սովորութիւն չկայ խօսելու ապագայի մասին, գաղափարներ յայտնելու, որոշելու թէ ո՞րն է ամէնէն յաջող եւ իրատես ապագան: Այս համաժողովին պիտի իմանանք, թէ այս հարցերու շուրջ ի՞նչ կարծիք ունի ժողովուրդը եւ ըստ այդմ յառաջանանք”,– շեշտած է ան, յուսալով որ քննարկումներու արդիւնքները ընդունելի կ՚ըլլան բոլորին համար, ներառեալ՝ նաեւ Հայաստանի կառավարութեան։

“Այս համաժողովը միւսներէն կը տարբերի, որովհետեւ մասնակիցները տարբեր են։ Անոնք ընտրուած են պատահականութեամբ եւ կը ներկայացնեն Հայաստանի, Արցախի եւ Սփիւռքի  Հայութիւնը: Անոնք պարզապէս Հայեր են, որոնք հետաքրքրուած են մասնակցելով կարեւոր հարցերու քննարկումներուն: Նաեւ ձեւաչափը բոլորովին տարբեր է. մենք հոս չենք նստիր ու լսեր դասախօսութիւններ, այլ միասին կը խօսինք, նոյնիսկ կը վիճինք, եթէ անհրաժեշտ է: Վերջնական քուէարկութեամբ կ՚որոշուի, թէ  որո՞նք են ամէնէն կարեւոր հարցերը, որոնցմով պէտք է զբաղինք: Մեր ապագայի կառուցման համար ի՞նչ ծրագրեր կան, որոնց կրնանք հետեւիլ”,– ըսած է Աֆէեան:

Ան աւելցուցած է նաեւ, որ «Մենք արմատներ ունինք աշխարհի տարբեր կողմերը։ Իմ ընտանիքը Ուրֆայէն եկած է՝ հարիւր տարի առաջ։ Երեսուն տարի առաջ մեզի առիթ տրուեցաւ մեր ապագայով զբաղելու, բայց, դժբախտաբար, տագնապներու պատճառով չկրցանք․․․ 100 տարի առաջուան եւ մեր այսօրուան երազանքը նոյնն է՝ համախմբուիլ, կազմակերպուիլ եւ անկախ Հայաստան ստեղծել»։