Փետրուար 5-ին, վարչապետ Նիկոլ Փաշինեան մասնակցած է Միջազգային կրօնական ազատութեան համաժողովին, ուր իր ելոյթին յատկապէս նշած է.

“Հայաստանի Հանրապետութեան գլխաւոր կրօնական հաստատութիւնը Հայ Առաքելական եկեղեցին է, եւ այդ բնական է, որովհետեւ Հայաստան աշխարհի առաջին երկիրն է, որ ընդունած է քրիստոնէութիւնը՝ որպէս պետական կրօն եւ այդ կատարուած է 301 թուականին իսկ, հայոց թագաւոր Տրդատ Գ.ի կողմէ։ Այդ պահէն Հայ առաքելական եկեղեցին էական դեր խաղացած է մեր ժողովուրդին համար։

Հայաստանի մէջ ունինք նաեւ Հայ կաթողիկէ եկեղեցին, ունինք նաեւ Ամերիկայի Հայ աւետարանչական ընկերակցութիւնը, որոնք կը գործեն ազատօրէն եւ մեծ յարգանք կը վայելեն մեր հասարակութեան մէջ։ Կան նաեւ քրիստոնէական այլ կրօնական կազմակերպութիւններ, որոնք կը գործեն ազատ։

Կ՚ուզեմ նաեւ նշել, որ Հայաստանի մէջ կը գտնուի աշխարհի ամենամեծ եզդիական համայնքը եւ վերջերս Հայաստանի մէջ կառուցուեցաւ աշխարհի ամենամեծ եզդիական տաճարը։ Հայաստանի մէջ ներկայ են նաեւ Ռուս ուղղափառ եկեղեցին, Ասորական եկեղեցին, ռուս մոլոկաններ, հեթանոսներ։

Հայաստանի հրէական համայնքը թէեւ փոքր է, բայց կարեւոր դեր ունի մեր բազմազան հասարակութեան մէջ՝ իր հոգեւոր կեանքով, որ կեդրոնացած է Երեւանի սինակոկին շուրջ:

Մեր մայրաքաղաք Երեւանի կեդրոնը գործող մահմետական մզկիթ ունինք, որ մեր մշակութային ժառանգութեան շատ կարեւոր մէկ մասն է։

Բարեբախտաբար, հակառակ քաղաքական ու ցեղային հակասութիւններուն, մենք ունինք կրօնական հանդուրժողականութեան ու յարգանքի լաւ աւանդութիւն մեր տարածաշրջանին մէջ, եւ այդ աւելի իրատեսական կը դարձնէ կայուն խաղաղութիւնն ու կայունութիւնը Հարաւային Կովկասոի մէջ: Եւ մենք յոյս ունինք, որ մեր տարածաշրջանային վէճերը կը վերածենք տարածաշրջանային երկխօսութեան, եւ կրօնական ազատութիւնը այն գործիքներէն մէկն է, որ կրնայ այդ իրականութիւն դարձնել”։

***

Վարչապետը դասախօսած է «Ճորճթաուն» համալսարանին մէջ

Վարչապետ Փաշինեան այցելած է նաեւ Ուաշինկթընի «Ճորճթաուն» համալսարանը, ուր ելոյթ ունեցած է։ Ներկայ եղած են՝ քաղաքագիտութիւն, միջազգային յարաբերութիւններ եւ անվտանգութիւն ուսումնասիրող ուսանողներ և դասախօսներ: 

***

Վարչապետը մասնակցած է «Ազգային աղօթքի նախաճաշ»-ին

Վարչապետը մասնակցած է նաեւ 5-րդ ամէնամեայ Միջազգային կրօնական ազատութեան համաժողովի ծիրէն ներս կազմակերպուած փակ ձեւաչափով «Ազգային աղօթքի նախաճաշ»-ին, ուր նաեւ ելոյթ ունեցած է։