Լուսանկարները՝ Petr Dyrc-ի

Փետրուար 28-ին, Փրակայի քաղաքապետարանի «Սմեթանա» դահլիճին մէջ տեղի ունեցած է հայ տաղանդաւոր մեներգչուհի Ճուլիանա Գրիգորեանի եւ անուանի մոնղոլ պարիթոն Ամարթուվշին Էնխպաթի հրաշալի համերգը, Փրակայի Ֆիլհարմոնիք նուագախումբի ընկերակցութեամբ:

Մենակատարութիւններով եւ զուգերգերով հնչած են արիաներ՝ իտալական յայտնի օփերաներէն, իսկ Ճուլիանա Գրիգորեան կատարած է նաեւ անուանի չեխ երաժիշտ Անթոնէն Տվորժաքի արիան՝ «Ջրահարս» օփերայէն, որ յուզած է հանդիսականները:

Համերգի աւարտին, ներկաներու փափաքին ընդառաջելով, մեներգչուհին ա գափելլա երգած է Սուրբ Գրիգոր Նարեկացիի «Հաւուն, Հաւուն» տաղը:

Մեներգիչները արժանացած են ներկաներու երկարատեւ ծափահարութիւններուն։

Նշենք, թէ համերգը տեղի ունեցած է Nachtigall Artists Management-ի համագործակցութեամբ եւ Հայաստանի դեսպան Աշոտ Յովակիմեանի պատուոյ հովանաւորութեամբ։