Ալիեւի «բնապահները» լուռ են

Մինչ Ազերպայճան բնապահական խնդիրներու պատրուակով փակած է Արցախը Հայաստանին եւ արտաքին աշխարհին կապող միակ ճամբան՝ Բերձորի միջանցքը, որու հետեւանքով 120 հազար բնակիչ կանգնած է մարդասիրական ճգնաժամի առջեւ, Պաքուի մերձակայքը գտնուող Սապունճի թաղի հազարաւոր բնակիչներ կը թունաւորուին մազութէն եւ աղբէն։ 

Ազերպայճանի իշխանութիւններու կողմէ ուղարկուած «բնապահներ»-ը, սակայն, չնկատել կը ձեւացնեն իրենց քիթին տակ յառաջացած բնապահական խնդիրը, կամ ալ իրենց նպատակը այլ է՝ ահաբեկել խաղաղ բնակչութիւնը (այս պարագային Արցախի), իսկ Սապունճիի բնակիչները արդէն իսկ ահաբեկուած են նախագահ Իլհամ Ալիեւի քարիւղի վերամշակման գործատուներու թափօններով։

Ազերպայճանցի լրագրողներէն մէկը դէպքի վայրէն տեղեկատուական նիւթ պատրաստած է «Սապունճիի կեանքը կը թունաւորեն մազութով եւ աղբով» վերնագրով, ուր նշուած է, թէ Պաքուի մօտ, գործող քարիւղահանքերու կեդրոնը գտնուող բնակավայրի հազարաւոր բնակիչներ շատոնց արդէն այն զգացումը ունին, որ իրենց տուները կը գտնուին աղբանոցի մը մէջ։ Այդ թաղին մէջ կը գտնուի չորս հեկտարի հասնող մազութի լճակ մը, ուր բնակիչները աղբ ու կենցաղային թափօններ կը նետեն:

Տեղացիները կը պատմեն, թէ ամռան սարսափելի գարշահոտի պատճառով, որով ներծծուած է այդ տարածքը, Սապունճիի մէջ շնչելը պարզապէս անկարելի է։ Այնպէս կ՚երեւի, թէ աշնան եւ ձմռան եղանակները բնակիչներու համար քիչ մը աւելի դիւրին են, բայց իրականութեան մէջ կացութիւնը հետզհետէ կը վատթարանայ։

“Նոյնիսկ թեթեւ անձրեւ մը ջրհեղեղ կը յառաջացնէ։ Լճակի ջրանցքը լեցուած է աղբով եւ թափօններով: Նոյն պատկերը կը պազուի ձնհալէն ետք։ Աշնան եւ ձմռան մենք պարզապէս ճարահատ կը փակենք մեր տուները, կը հեռանանք այստեղէն եւ կը գիշերենք հարազատներու քով”,– կը պատմէ բնակիչներէն մէկը։

Դէպքի վայր գտնուող լրագրողը նկարագրած է Սապունճիի մէջ ստեղծուած կացութիւնը։

«Քանի մը երախաներ մեր աչքին առջեւ կը խաղային մազութի լճակին մօտ։ Հանդիպելով մեր տարակուսած եւ հարցական հայեացքին՝ տեղացիները, ձեռքերնին այս ու այն կողմ պարզելով, ըսին, թէ իրենց միշտ վտանգ կը սպառնայ։ Եւ խօսքը միայն քարիւղի մասին չէ, որ որեւէ պահու կրնայ բռնկիլ: Ցեխի պատճառով հողածածկ փողոցները պարզապէս անանցանելի դարձած են»,- նշած է լրագրողը։

Բնակիչները յոյս չունին, թէ խոստումներով կերակրող իշխանութիւնները օր մը պիտի լուծեն Սապունճիի ահաւոր խնդիրը եւ հարց ալ չի յառաջանար, թէ ինչո՞ւ Բերձորի միջանցքը փակած «բնապահները» բողոքի ցոյց չեն ըներ տարիներէ ի վեր չլուծուած խնդիրը ներկայացնելու համար։

Ազերպայճանի մէջ լուրջ բնապահական խնդրի մասին ահազանգող յօդուածը հրապարակած էր Haqqin.az կայքը, սակայն որոշ ժամանակ ետք, այդ գրութիւնը, հասկնալի պատճառներով, ջնջուած է կայքէն: 

Լուսանկարները Haqqin.az-ի