Ազերպայճանի Արտաքին գործոց նախարարութեան բանբեր Այխան Հաճիզատէ՝ հակադարձելով Հայաստանի Արտաքին գործոց նախարարութեան յայտարարութեան ըսած է. “Ազերպայճան մարդասիրական վերաբերում ցուցաբերած է եւ հետեւելով միջազգային մարդասիրական իրաւունքի շրջանակներուն մէջ ստանձնած իր պարտաւորութեան՝ ազատ արձակած է աւելի քան 200 հայեր, որոնք ռազմագերիներ էին: Բայց այդ հայ գերիներէն ոմանք ազատ արձակուելէ ետք ձերբակալուած ու հարցաքննուած են Հայաստանի իշխանութիւններուն կողմէ”։ 

Պաքու մարդասիրութեան «մեծ ժեսթ» կը կոչէ նաեւ «2023-ին աւելի քան 10 հազար զինուորներու՝ ազերպայճանական տարածքներէն հեռանալը թոյլ տուած» ըլլալը։

Հայկական կողմի յայտարարութիւնը, ըստ Պաքուի, ցոյց կու տայ, թէ այս դատավարութենէն «որքան ջղայնացած է Հայաստանի քաղաքական վերնախաւը, որ բացայայտօրէն աջակցած է Ազերպայճանի դէմ յարձակումին»։

“Հայաստանի պետական պատասխանատւութիւնը եւ այլ անօրինական գործողութիւնները՝ իբրեւ բռնագրաւող եւ յարձակող երկիր, փաստ է, որ չի կրնար հերքուիլ։ Յանցագործները պատասխանատւութեան ենթարկելը արդար է եւ քաղաքական խարդաւանանքի չի կրնար ենթարկուիլ։ Հայաստան այսօր փոխանակ ողջունելու պատերազմական յանցագործութիւններով մեղադրուող մարդոց դատավարութիւնները, զանոնք կը կոչէ «բեմականացուած»”, – ըսած է Հաճիզատէ։