Սեպտեմբեր 16-ին հազարաւոր Լիբանանահայեր բողոքի իրենց ձայնը բարձրացուցած են Ազերպայճանի դեսպանատան դիմաց` դատապարտելով Հայաստանի դէմ այդ երկրի գործած զինուորական յարձակումը, քաղաքայիններուն դէմ գործած բռնութիւնները եւ նահատակ զինուորականներուն դիակները պղծելու անոր արարքները:
Ցուցարարները պարզած են Հայաստանի ու Արցախի դրօշները եւ թշնամիին բռնարարքները դատապարտող պաստառներ։
Ցոյցին ելոյթ ունենալով՝ երեսփոխան Յակոբ Բագրատունի յայտարարած է.-
“Այսօր Լիբանանահայութեան այս ցոյցը թշնամիին դեսպանատան դիմաց առաջին քայլն է Սփիւռքի մէջ ա՛յն համաժողովրդային դիմադրութեան, որ պիտի սկսի: Պիտի սկսի, որպէսզի դարձեալ վերատիրանանք Արցախին, որպէսզի դարձեալ վերատիրանանք Ազերպայճանի կողմէ գրաւուած հայաստանեան հողերուն: Մեր ժողովուրդէն կ՚ակնկալենք պատրաստակամութիւն, զգօնութիւն, ինչպէս նաեւ կ՚ակնկալենք, որ պատրաստ ըլլան հայրենիքի կանչին”:
Ցոյցի ընթացքին հրկիզուած է Ազերպայճանի դրօշը։
