Սեւ ծովի ափին գտնուող Վառնա քաղաքին մէջ կը հիմնուի պուլկարահայ մշակութային տեղեկատուական կեդրոն։ Որոշումը կայացուած է Սուրբ Ծննդեան հայկական ամէնամեայ բարեսիրական պարահանդէսի ընթացքին: Լուրը հաղորդած է պուլկարական BTA (Bulgarian news agency) լրատու գործակալութիւնը՝ յղում կատարելով Հայկական Բարեգործական Ընդհանուր Միութեան (ՀԲԸՄ)։

Նոր կեդրոնի առաջին ձեռնարկը տեղի կ՚ունենայ Ապրիլ 30-ին. Համերգով ելոյթ կ՚ունենայ Քրիսթինա Ազնաւուր, հովանաւորութեամբ՝ Պուլկարիոյ մէջ Ֆրանսայի եւ Հայաստանի դեսպաններ Ժոէլ Մեյերի եւ Արմէն Եդիգարեանի։

Միութեան անդամները քննարկած են նաեւ 1977-1983 ժամանակաշրջանի Վառնայի բժշկական համալսարանի տնօրէն, դասախօս փրոֆ. Կարապետ Գաբրիէլեանի անունով փողոց մը անուանելու եւ անոր խորաքանդակը տեղադրելու ծրագիրը: Ան եղած է ժահրաբանութեան ամպիոնի եւ քաղաքի քանի մը հիւանդանոցներու հիմնադիրը։ Ներկայիս իր որդին ՀԲԸՄ-ի վարչական խորհուրդի փոխնախագահն է։