Արցախի Հանրապետութեան Պետական նախարար Ռուբէն Վարդանեանի ղեկավարութեամբ, Յունուար 13-ին տեղի ունեցած Տեղեկատուական կեդրոնի նիստին քննարկուած են երկրին մէջ ստեղծուած ուժանիւթի ճգնաժամի պայմաններու տակ բնակչութեան նուազագոյն կարիքները բաւարարելու եւ կենսական նշանակութիւն ունեցող ծառայութիւններու անխափան գործունէութիւնը ապահովելու առնչուող հարցեր։
Ինչպէս ծանօթ է, Յունուար 9-էն ի վեր Արցախի 120 հազար բնակչութիւնը փաստօրէն զրկուած է անխափան ելեկտրականութեան մատակարարման կարելիութենէ։ Հանրապետութեան մէջ ներկայիս ելեկտրական ուժանիւթի պահանջը կը բաւարարուի միայն ներքին՝ խիստ սահմանափակ աղբիւրներու հաշուոյն։
Նախարար Վարդանեան նշած է, որ այս առումով բաւական բարդ իրավիճակ ստեղծուած է եւ պէտք է այնպիսի քայլերու ձեռնարկուին, որոնք թոյլ կու տան կարելիին չափ երկար ժամանակ ապահովել բնակչութեան ուժանիւթի նուազագոյն կարիքները:
Ան յանձնարարած է այդ բնագաւառի պատասխանատուներուն՝ սեղմ ժամանակի ընթացքին ուժանիւթի խնայողական եղանակի անցնելու եւ ելեկտրական ուժանիւթի սպառումը առաւելագոյնս նուազեցնելու վերաբերեալ առաջարկներ ներկայացնել:
Նիստի մասնակիցները անդրադարձած են նաեւ տնտեսական ծանր կացութեան եւ հիմնարկ-ձեռնարկութիւններու գործունէութեան դադրեցման հետեւանքով աշխատանքէ զրկուած քաղաքացիներու հարցերուն: Նախարարը յանձնարարած է այս կապակցութեամբ ալ առաջարկներ ներկայացնել:
