Ռումանիոյ մէջ ՀՀ դեսպանութիւնը օգնութիւն կը ցուցաբերէ Ուքրաինայէն փախչող եւ աջակցութեան կարիք ունեցող ՀՀ քաղաքացիներուն, ինչպէս նաեւ ազգութեամբ հայ ուքրաինացի քաղաքացիներուն։
Դեսպանութեան հրապարակած հաղորդագրութեան համաձայն՝ Մարտ 1-էն Ուքրաինայի եւ Մոլտովայի սահմանամերձ Պոթոշանի քաղաքին մէջ կը գործէ Ռումանիոյ ՀՀ հիւպատոսութեան առժամեայ գրասենեակը։ Բացման պահէն ի վեր հոն անհրաժեշտ օժանդակութիւն կը ցուցաբերուի եւ խորհրդատւութիւն կը կատարուի ՀՀ քաղաքացիներուն:
ՀՀ դեսպանութիւնը սերտօրէն կը համագործակցի Ռումանիոյ պատկան մարմիններուն հետ։ Այդպէսով ալ կը կազմակերպուի մեր հայրենակիցներուն մուտքը Ռումանիա, ինչպէս նաեւ՝ վերադարձը հայրենիք։
Հայ գաղթականներուն կ՚օժանդակեն նաեւ Պոթոշանի, Պայա-Մարէ, Սուչաւա եւ Թուլչա քաղաքներուն մէջ գործող հայկական կառոյցներու ներկայացուցիչները եւ օտարազգի կամաւորներ։
