Փարիզի Վերաքննիչ ատեանի 2024 Սեպտեմբեր 10-ին կայացուցած վճիռին համաձայն, եւ այս նպատակով նշանակուած ժամանակաւոր վարիչի հրաւէրով` Ուրբաթ, 4 Ապրիլ 2025-ին տեղի ունեցաւ [Սեւրի] Սամուէլ Մուրատ վարժարանի միութեան ընդհանուր ժողովը, որուն ընթացքին ընտրուեցաւ միութեան նոր վարչութիւն` հետեւեալ կազմով.
– Մխիթարեան Միաբանութիւն
– Հ. Պօղոս (Վիգէն) վրդ. Գոճանեան
– Հ. Եղիա (Պետրոս) վրդ. Քիլաղպեան
– Հ. Վահան (Վիգէն) վրդ. Օհանեան
– Հ. Նարեկ (Ճորճ) վրդ. Տատուրեան
– Հ. Համազասպ (Փանոս) վրդ. Քէշիշեան։
Նորընտիր վարչութիւնը իր անդրանիկ նիստին որոշեց նոր վարչական գործադիր մարմին, հետեւեալ պաշտօններով.
– Նախագահ` Հ. Նարեկ վրդ Տատուրեան
– Փոխնախագահ` Հ. Համազասպ վրդ. Քէշիշեան
– Քարտուղար` Հ. Եղիա վրդ. Քիլաղպեան
– Գանձապահ` Հ. Վահան վրդ. Օհանեան։
Վարչութիւնը հանդիսաւոր կերպով վերահաստատեց իր նուիրուածութիւնը Միութեան կրթական, մշակութային եւ Ցեղասպանութեան յիշատակի եռակի առաքելութեան եւ առաքելութիւնը կատարելու համար Սեւրի հայկական վարժարանի տարածքի պահպանման։
Յաջորդաբար հազիւ Միութեան դիւանը եւ թղթաբանութիւնը տրամադրելի դառնայ պիտի ուսումնասիրուին վերջին հինգ տարիներու գործունէութիւնը եւ հաշուեկշիռը եւ նախաձեռնած ծրագրերու իրականացման գործընթացը։
Վարչութիւնը շուտով պիտի քննարկէ միութեան նոր ուժերով համալրման հնարաւորութիւնը՝ ընդունելով նոր անդամներ, որոնք կապուած ըլլան վարժարանին եւ մտահոգ՝ անոր ներկայով ու ապագայով։
Միութեան խորհուրդը շնորհակալութիւն կը յայտնէ հայ գաղութի բոլոր անդամներուն, որոնք միշտ սրտակցութիւն ցուցաբերած եւ սատար կանգնած են Վարժարանին ու անոր առաքելութեան եւ որոնք պիտի շարունակեն ապագային նաեւ անոր զօրավիգ կանգնիլ եւ օգտակար դառնալ։ ■
© 2023 Բոլոր իրաւունքները վերապահուած են։
