Հայաստանի պետական գանձատրումով Սպանիոյ մայրաքաղաք Մատրիտի Գոմփլութենսէ  համալսարանին մէջ պաշտօնապէս բացուած է հայագիտական առաջին ամպիոնը, ներկայութեամբ Կրթութեան, գիտութեան, մշակոյթի եւ մարզանքի փոխնախարար Արթուր Մարտիրոսեանի: Վերջինս տեղւոյն վրայ ծանօթացած է հայապահպանութեան առնչուող խնդիրներուն, պատկան մարմիններուն հետ քննարկելով Նախարարութեան իրաւասութիւններու շրջանակին մէջ անոնց լուծումները, ինչպէս նաեւ գործող միօրեայ դպրոցներուն՝ համապատասխան գրականութեամբ եւ օժանդակ ուսումնական նիւթերով աջակցութիւն ցուցաբերելու կարելիութիւնները:

Հայագիտական կեդրոնի բացման արարողութեան Արթուր Մարտիրոսեան իր ելոյթին նշած է, թէ հայագիտութեան ոլորտը մնայուն կերպով կը գտնուի Հայաստանի կառավարութեան ուշադրութեան կեդրոնին:

“Սպանիոյ մէջ հայագիտական կեդրոնին բացումը կարեւոր է քանի մը տեսանկիւնէ:  Այստեղ, վերջին տուեալներու համաձայն՝ 10.000-է աւելի Հայ կ՚ապրի, ուստի այսպիսի մեծ հայ համայնք ունեցող երկրին համար չափազանց կարեւոր է կրթութեան շարունակութեան ապահովումը: Կարեւոր բաղադրիչ է նաեւ հայոց լեզուի եւ հայ մշակոյթի տեսանելիութեան ապահովման խնդիրը: Համոզուած եմ՝ հայագիտական կեդրոնը երկու պետութիւններու միջեւ մշակութային երկխօսութեան եւ միջպետական համագործակցութեան ամուր կամուրջ կրնայ հանդիսանալ”,– ըսած է  փոխնախարարը եւ աւելցուցած, որ յառաջիկային կը նախատեսուին շարք մը ծրագրեր իրականացնել հայագիտութեան բնագաւառին մէջ, մասնաւորապէս՝ Եւրոպայի բոլոր հայագիտական կեդրոններու մասնակցութեամբ պիտի կազմակերպուի համաժողով մը՝ քննարկելու ցանցային համագործակցութեան եւ միասնական հետազօտութիւններ կատարելու կարելիութիւնները:

Նշենք, թէ Մատրիտի Գոմփլութենսէ համալսարանի տնօրէն Խոաքին Կոյացէ Կոնիի հրամանագրով համալսարանի հայազգի դասախօս Ֆրանսիսքօ Սուրեան Հերնանտես նշանակուած է հայագիտութեան ամպիոնի տնօրէն։