Յունիս 8-ին, «Մենք ենք մեր սարերը» տարածքային զարգացման գործակալութեան նախաձեռնութեամբ սկսած է Արցախի ջերմոցներու վերազինման ծրագիրը, նպատակ ունենալով շրջափակման հետեւանքով ստեղծուած պարէնային ճգնաժամի մեղմացումը:

Ծրագիրը կը նախատեսէ շուրջ 14․000 քառ մ. ջերմոցային տնտեսութեան վերազինում` զովացման, խոնաւացման, լուսաւորման, ջեռուցման, ոռոգման եւ պարարտացման համակարգերով, որ կարելիութիւն կ՚ընձեռէ զգալիօրէն աւելցնելու արտադրանքի ծաւալները:

Ծրագիրը կ՚իրականացուի պետական համագործակցութեամբ: Վերջերս, «Մենք ենք մեր սարերը» գործակալութեան եւ Արցախի Հանրապետութեան գիւղատնտեսութեան նախարարութեան եւ գիւղի ու գիւղատնտեսութեան աջակցութեան հիմնադրամին միջեւ համագործակցութեան պայմանագիր ստորագրուած է, եւ արդէն սկսած է դիմումներու ներկայացման հոլովոյթը:

Ծրագրին շահառու կրնան դառնալ 300 եւ աւելի քառ. մ. տարածք ունեցող ջերմոցներու սեփականատէրերը։ Անոնք իրենց դիմումները կրնան ներկայացնել Գիւղատնտեսութեան նախարարին կողմէ ստեղծուած մասնագիտական յանձնաժողովին: Ջերմոցներու վերազինման  աշխատանքներու ընդհանուր արժէքի 95 տոկոսի գանձատրումը պիտի ապահովուի «Մենք ենք մեր սարերը» գործակալութեան կողմէ՝ Գիւղի եւ գիւղատնտեսութեան աջակցութեան հիմնադրամին միջոցով (որուն 45 տոկոսը պիտի ձեւակերպուի անտոկոս փոխառութեան ձեւով), իսկ 5 տոկոսը կը վճարէ սեփականատէրը:

Ծրագրին վերաբերող հարցերը  քննարկուած են նաեւ «Մենք ենք մեր սարերը» գործակալութեան համահիմնադիր Ռուբէն Վարդանեանի եւ Արցախի ջերմոցային տնտեսութիւններու զարգացման ընկերակցութեան անդամներուն հետ հանդիպումին: Խօսելով Արցախի պարէնային անվտանգութեան ապահովման տեսանկիւնէն ծրագրին կարեւորութեան  մասին՝ Ռուբէն Վարդանեան նշած է. “Ադրբեջանի կողմից Արցախի շրջափակումը ստիպում է քայլեր իրականացնել պարէնային ինքնաբաւութեան ապահովման ուղղութեամբ: Այս ծրագիրը մի քանի խնդիր է լուծում: Այն կարեւոր է թէ՛ պարէնային անվտանգութեան ապահովման, թէ՛ գործարարութեան զարգացման, թէ՛ այս իրավիճակում Արցախում աշխատատեղերի պահպանման ու նորերի ստեղծման տեսանկիւնից: Ծրագիրը նպաստելու է նաեւ գիւղատնտեսութեան մէջ նոր չափորոշիչների ներդրումին, ինչը չափազանց կարեւոր է ոլորտի զարգացման համար: Ես շնորհակալ եմ գործակալութեան նուիրատուներին, ովքեր իրենց ներդրումներով օգնելու են այսպիսի կարեւոր խնդրի լուծմանը”:

Նշենք, թէ «Մենք ենք մեր սարերը» գործակալութիւնը կը ձեռնարկէ Արցախի եւ Սիւնիքի զարգացման ծրագրերու՝ համագործակցելով Արցախի եւ Հայաստանի կառավարութիւններու, ինչպէս նաեւ տեղական, միջազգային եւ առանձին այլ կազմակերպութիւններու հետ։ «Մենք ենք մեր սարերը» գործակալութիւնը հիմնադրած են Ռուբէն Վարդանեան եւ իր գործընկերները։