Վիրահայոց թեմի առաջնորդ Կիրակոս եպիսկ. Դաւթեանի օրհնութեամբ եւ օժանդակութեամբ, եկեղեցւոյ նուիրեալ բարերար Դաւիթ Բաբայեանի աջակցութեամբ եւ  Գէորգ սրկ. Աւետիսեանի նախաձեռնութեամբ, Մարտ 28–31 տեղի ունեցած է 30 երիտասարդներու «Դէպի հայրենիք» ծրագրի շրջանակին մէջ ուխտագնացութիւնը՝ Հայաստան:

Ուխտագնացութեան առաջին օրը արեւոտ Երեւանը դիմաւորած է ուխտաւորները՝ Մատենադարանի եզակի ձեռագրերով, Մաշտոցեան պողոտայի շունչով:

Երիտասարդները յաջորդող օրերուն այցելած են Ծիծեռնակաբերդ՝ յարգելով Ցեղասպանութեան սրբադասուած նահատակներու յիշատակը: Չարենցի կամարին տակ անոնք վայելած են Արարատի վեհաշուք տեսարանը՝ ազգագրական երգերով ու ասմունքով։ Գառնիի ու Գեղարդի մէջ ոչ միայն զգացած են պատմութեան շունչը, այլեւ մասնակցած են երեկոյեան ժամերգութեանց։

Մայր Աթոռ Սուրբ Էջմիածնի մէջ պատարագին մասնակցելէ ետք, ուխտաւոր երիտասարդները ստացած են Վեհափառ հայրապետին օրհնութիւնը, իսկ Ս. Գայիանէ եւ Ս. Հռիփսիմէ վանքերուն մէջ մասնակցած են միասնական աղօթքին, Բջնիի մէջ ալ՝ ազգային երգ ու պարով լի խնճոյքին։

Երիտասարդները թախիծով ու տրտմութեամբ այցելած են Եռաբլուր, խոնարհած հայրենիքի համար նահատակուած հերոսներու շիրիմներուն առջեւ:

Թիֆլիսէն ժամանած երիտասարդ ուխտաւորները այցելած են նաեւ Օշականի Ս. Մեսրոպ Մաշտոց եկեղեցի, այնուհետեւ՝ Յովհաննավանք: Վերջին կանգառը Բաշ-Ապարանը, Դրոյի յիշատակի կոթողը եղած է:

Վիրահայոց թեմի երիտասարդներուն համար այս ուխտագնացութիւնը ոչ միայն ճամբորդութիւն էր, այլեւ հոգեւոր ու ազգային ինքնութեան վերագտնում։