Մայիս 7-ին, Ֆրանսայի հարաւ-արեւմտեան Նուվէլ Աքիթէն շրջանի Տորտոնյի նահանգը գտնուող Սէն-Շամասի գիւղին մէջ, Հայաստանի դեսպանի բարձր հովանաւորութեամբ եւ ֆրանսահայ կազմակերպութիւններու նախաձեռնութեամբ՝ տեղի ունեցած է Հայոց ցեղասպանութեան կոտորածներուն հերոսաբար դիմադրած Մուսա Լեռան Հայերուն փրկութեան ձեռք մեկնած ֆրանսացի ծովակալ Լուի Տարթիժ տիւ Ֆուրնէի կիսանդրիին պաշտօնական բացումը։ Սէն-Շամասի գիւղին մէջ կը գտնուի ֆրանսացի ծովակալին գերեզմանը, որ 2015-ին յայտաբերուելէն ի վեր՝ ուխտատեղի  դարձած է Հայութեան համար։ 

Սէն-Շամասիի եկեղեցւոյ բակին մէջ՝ մեծաթիւ հիւրերու ներկայութեամբ, զինուորական կարգով տեղի ունեցած հանդիսաւոր արարողութեան մասնակցած են Տորտոնյի փոխնահանգապետ Նատին Մոնթեյ, գիւղապետ Ռոլան Տելմաս, Հայաստանի դեսպանութեան երկրորդ քարտուղար Սուսաննա Ադամեան, Ֆրանսայի ռազմածովային ուժերու բարձրաստիճան ներկայացուցիչներ, խորհրդարանականներ, գիւղական խորհուրդի անդամներ, Ալֆորվիլի քաղաքապետի կցորդ Սարօ Մարտիրեան, «Ֆրանսա-Մուսա Լեռ» կազմակերպութեան նախագահ Սեւակ Մարտիրեան, Փերիկորի հայկական ընկերակցութեան նախագահ Մասիս Փեհլիվանեան եւ փոխնախագահ Դանիէլ Արապեան, ծովակալի ընտանիքի անդամներ, Ֆրանսահայեր, տեղւոյն բնակիչներ։ 

Ելոյթներով հանդէս եկած են Նատին Մոնթեյ, Ռոլան Տելմաս, Սուսաննա Ադամեան, Սարօ Մարտիրեան, Դանիէլ Արապեան։

Լուի Տարթիժ տիւ Ֆուրնէի զարմիկը կարդացած է Մուսալեռցիներու հերոսամարտի օրերուն ֆրանսացի ծովակալին իր մօր ղրկած նամակները։

Անդրադառնալով Հայաստանի եւ Արցախի առջեւ ծառացած այսօրուան սպառնալիքներուն եւ Բերձորի միջանցքի փակման՝ հինգ ամիսէ ի վեր Մուսալեռցիներու օրինակով հերոսաբար դիմադրող Արցախայութեան՝ բանախօսները իրենց անվերապահ զօրակցութիւնը յայտնած են հայ ժողովուրդին։     

Ծովակալի կիսանդրիի բացման արարողութենէն ետք, յարգանքի տուրք մատուցուած է անոր գերեզմանին, ուր քաղաքի դպրոցականները կատարած են Հայոց ցեղասպանութեան զոհերուն նուիրուած Շառլ Ազնաւուրի՝ «Անոնք ինկան» երգը։ 

Ծովակալի յիշատակին նուիրուած մշակութային ձեռնարկներու շարքին ներկայացուած են Մուսա Լեռան պատմութեան արխիւային լուսանկարներու ցուցահանդէսներ, ինչպէս նաեւ գիտաժողովներ, որոնց ընթացքին բանախօսած են ֆրանսահայ պատմաբան Յարութիւն Գէորգեան եւ Ժան Գորտէլ, որ Մուսալեռցիներուն փրկութեան հասած «Կիշան» եւ «Տեզէ» ռազմանաւերու անձնակազմի անդամներէն Ժան լը Մերի թոռն է եւ լաւապէս կը տիրապետէ Մուսա Լեռան հերոսամարտի փաստերուն։ 

Տեղի ունեցած է նաև Մուսա Լեռան աւանդական հարիսայի հիւրասիրութիւն։