«Գարեգին Բ. խախտած է իր իսկ կամաւորաբար ստանձնած կուսակրօնութեան ուխտը եւ զաւակ ունի»

«Եկեղեցու հաւատաւոր հետեւորդներին կոչ եմ անում համախմբուել վեհարանը քրիստոնէաբար ազատելու շուրջ»

Վարչապետ Փաշինեան սաստկացուցած է որոշ հոգեւորականներու, յատկապէս Ամենայն հայոց կաթողիկոսին դէմ քանի մը օր առաջ սանձազերծած գրոհը։ 

Այսպէս Յունիս 9-ին Դիմագիրքի իր էջին կրկնած է պնդումը, որ Գարեգին Բ. խախտած է իր իսկ կամաւորաբար ստանձնած կուսակրօնութեան ուխտը եւ զաւակ ունի։

«Սա փաստ է, եւ եթէ Գարեգին Բ.-ն փորձի հերքել, անհրաժեշտ ձեւաչափով դա կ՚ապացուցեմ։

Ըստ այսմ՝ համաձայն Հայ առաքելական եկեղեցու Կանոնագրքի՝ Գարեգին Բ.-ն չէր կարող լինել եպիսկոպոս, արքեպիսկոպոս, չէր կարող ընտրուել եւ չի կարող լինել կաթողիկոս. Կտրիճ Ներսիսեանը պէտք է ազատի Վեհարանը։

Որպէս Հայ առաքելական եկեղեցու հաւատաւոր հետեւորդ, որպէս մարդ, որ խանդաղատանքով է վերաբերւում մեր հոգեւոր ժառանգութեան ամէն արժէքի, ամէն մասունքի, ամէն պատկերի ու քարի, արձանագրում եմ. Հայաստանեայց առաքելական սուրբ եկեղեցին պէտք է ունենայ նորընտիր կաթողիկոս, ում բարեվարքութիւնը կաթողիկոսական ընտրութիւններից առաջ ստուգուած եւ հաստատուած կը լինի։

Հայաստանեայց առաքելական սուրբ եկեղեցու հաւատաւոր հետըւորդներին կոչ եմ անում համախմբուել վեհարանը սիրով եւ քրիստոնէաբար ազատելու եւ ոեւէ իրապէս սրբազան հոգեւորականի Ամենայն հայոց կաթողիկոս ընտրելու օրակարգի շուրջ»,– գրած է վարչապետը:

Իսկ յաջորդ օր՝ Յունիս 10-ին ալ, «Վեհարանը ազատել»-ու իր միտքը աւելի ծաւալուն ներկայացուցած է հետեւեալ մանրամասնութիւնները բովանդակող՝ ժողովուրդին կոչով, նոյնպէս՝ Դիմագիրքի իր էջով.

«Հայաստանեայց Առաքելական Սուրբ Եկեղեցու սիրելի հաւատաւոր հետեւորդներ,

Որպէս ձեզնից մէկը դիմում եմ ձեզ․ մեզ անհրաժեշտ է գործուն քայլեր ձեռնարկել Մայր Աթոռ Սուրբ Էջմիածնի Վեհարանը ազատելու եւ կաթողիկոսական նոր ընտրութիւններ կազմակերպելու ուղղութեամբ։ 

Այս փուլում պիտի ստեղծենք Համակարգող խումբ, վերը նշուած օրակարգի կազմակերպչական հարցերը կարգաւորելու համար։ Համակարգող խմբի անդամ կարող են դառնալ Հայաստանեայց առաքելական սուրբ եկեղեցու այն հետեւորդները, ովքեր՝

ա) իրենց ամբողջ հոգով հաւատում են մեր կենդանի Տիրոջը՝ Յիսուս Քրիստոսին,

բ) գոնէ մէկ անգամ սկզբից մինչեւ վերջ կարդացել են Աստուածաշունչը, 

գ) վերջին հինգ տարում գոնէ մէկ անգամ պահել են Մեծ պահքը,

դ) ամէն օր աղօթում են, 

ե) հաւատում են, որ Մայր Աթոռի նորոգման օրակարգը բխում է Հայաստանեայց առաքելական սուրբ եկեղեցու, մեր ժողովրդի, մեր պետութեան շահերից եւ համապատասխան է մեր նախնիների սուրբ աւանդին։

Համակարգող խմբի անդամ կարող են լինել թէ՛ տղամարդիկ, թէ՛ կանայք, թէ՛ աշխարհիկ մարդիկ, թէ՛ հոգեւորականներ։ Կուսակրօն հոգեւորականների դէպքում պարտադիր է, որ նրանք խախտած չլինեն կուսակրօնութեան ուխտը։

Համակարգող խմբի առաջին 10 անդամների ընտրութեան պատասխանատւութիւնը կը վերցնեմ ինձ վրայ՝ վերը նշուած չափանիշերի շուրջ ունեցած զրոյցների գնահատմամբ։ 

Հետագայում Խումբը ինքը կ՚որոշի ընդլայնման ընթացակարգերը, իր կառուցուածքը եւ այլ հնարաւոր հարցեր»։