Ապրիլ 19-ին, Փարիզեան շրջան Շարանթոն-լը-Փոնի հայկական խաչքարին առջեւ տեղի ունեցած է Հայոց ցեղասպանութեան 108-րդ տարելիցին նուիրուած հանդիսաւոր արարողութիւն մը՝ Վալ-տը-Մառնի շրջանի նախագահին, բազմաթիւ քաղաքապետերու, նահանգային և տեղական իշխանութիւններու մասնակցութեամբ։ 

Իր ելոյթին Հայաստանի դեսպանուհի Յասմիկ Տոլմաջեան յիշեցուցած է, որ իր սեփական հայրենիքին մէջ Հայութեան նկատմամբ ցեղասպան քաղաքականութեան դրսեւորումները չեն սահմանափակուիր միայն 1915 թուականի Հայոց ցեղասպանութեամբ։ Անոնք սկիզբ առած են տակաւին 19-րդ դարու վերջին՝ Օսմանեան կայսրութեան մէջ 1894-1895 թուականներու հայկական ջարդերով, շարունակական բնոյթ կրած են 20-րդ դարու ընթացքին, հասնելով մինչեւ մեր օրերը: Ազերպայճանի կողմէ անթաքոյց կերպով իրականացուող ռազմատենչ եւ հայատեաց քաղաքականութիւնը, արդէն շուրջ 130 օրէ ի վեր Բերձորի միջանցքի խափանով արտաքին աշխարհէն Արցախի մեկուսացումով, 120 000 արցախահայ բնակչութեան դէմ իրագործուող ցեղային զտման քաղաքականութիւնը ատոր ակներեւ ապացոյցներն են: 

Արարողութեան ընթացքին ելոյթներ ունեցած են նաեւ տեղւոյն քաղաքապետ Հերվէ Ժիքէլ, Արցախի ներկայացուցիչ Յովհաննէս Գէորգեան, Վալ-տը-Մառնի ֆրանքեւհայկական կազմակերպութեան նախագահ Տելֆին Գույումճեան։ Կարդացուած են Ծերակոյտի Արտաքին յարաբերութիւններու, Պաշտպանութեան եւ Զինեալ ուժերու յանձնաժողովի նախագահ Քրիսթիան Գամպոնի եւ Ազգային ժողովի Արտաքին յարաբերութիւններու յանձնաժողովի փոխնախագահ Միշէլ Հերպիոնի ուղերձները: 

Արարողութեան մասնակցող պաշտօնական անձնաւորութիւնները ծաղկեպսակներ զետեղած են խաչքարին առջեւ եւ յարգանքի տուրք մատուցած մեր բիւրաւոր նահատակներու յիշատակին։

Ձեռնարկին ներկայ եղած են շրջանի հոգեւոր դասի ներկայացուցիչներ, ինչպէս նաեւ դպրոցական աշակերտներ։