Ապրիլ 1-ին, տեղի ունեցաւ Փարիզի «Ողջակէզի յուշահամալիր-թանգարան»-ի (Mémorial de la Shoah) նախաձեռնութեամբ կազմակերպուած «Հայոց ցեղասպանութիւնը Օսմանեան կայսրութեան մէջ» խորագրեալ բացօթեայ ցուցադրութեան բացման արարողութիւնը։

Ողջակէզի պատմութիւնը ուսումնասիրող Եւրոպայի մեծագոյն կեդրոններէն մէկուն մէջ կազմակերպուած սոյն արարողութեան ներկայ էին Յուշահամալիրի նախագահն ու տնօրէնը՝ Էրիք տը Ռոչիլտ եւ Ժաք Ֆրեճ, ցուցադրութիւնը համադրող, ֆրանսահայ պատմաբան Գլէր Մուրատեան, Հայաստանի դեսպան Արման Խաչատրեան, պատմաբան Ռեմոն Գէորգեան, ֆրանսահայ կազմակերպութիւններու ներկայացուցիչներ եւ բազմաթիւ հիւրեր։

Հայոց ցեղասպանութեան ոգեկոչման 110-ամեակին առիթով կազմակերպուած եւ արխիւային նիւթերու հիման վրայ պատմական դէպքերը ներկայացնող այս ցուցադրութիւնը այցելուներու համար բաց պիտի մնայ վեց ամիս շարունակ, որմէ ետք պիտի շրջագայի ամբողջ Ֆրանսայի մէջ։

Դեսպան Խաչատրեան ծանօթացաւ թէ՛ Հայոց ցեղասպանութեան նուիրուած ցուցադրութեան, թէ՛ Յուշահամալիրի՝ Ողջակէզի նուիրուած մնայուն ցուցադրութեան։ Աւարտին դեսպանը իր տպաւորութիւնը արձանագրեց Յուշահամալիրի պատուոյ հիւրերու ոսկեմատեանին մէջ։