Ֆութպոլի Եւրոպայի առաջնութեան ընտրական մրցաշարքի երկրորդ փուլին Շուէտ-Ազերպայճան հանդիպման ժամանակ Հայեր պարզած են Արցախի շրջափակումը դադրեցնելու կոչով պաստառ մը։ Լուրը հաղորդած է Հայաստանի հաւաքականի նախկին խաղացող, այժմ Շուէտ բնակող Լեւոն Պաչաջեան։

Ան Դիմագիրքի իր էջին գրած է.

«Շուէտը հայամէտ է, որովհետեւ մարդը, մարդկային կեանքը, մարդու ազատութիւնները բացարձակ արժէք են այստեղ։ Ինչպէս որ սպասում էի, Շուէտը 5-0 արդիւնքով յաղթեց Հայաստանի «հարեւանին», իսկ մարզադաշտին վրայ Արցախի եւ Հայաստանի դրօշները յիշեցնում էին, որ 120.000 հայ շրջափակման մէջ է»։

*  *  *

News.am-ի հետ զրոյցին սոյն նախաձեռնութեան հեղինակներէն մէկը պատմած է, թէ հայ երիտասարդները համախմբուած են յանուն Արցախի, որ 106 օրէ ի վեր շրջափակման մէջ կը գտնուի, եւ մարզադաշտին մէջ պարզած են «End the blockade of Artsakh» գրութեամբ պաստառը: Այդ ատեն Ազերպայճանի հաւաքականի մարզիչին օգնականը մօտեցած է հայ երիտասարդներուն, քաշքշած Արցախի դրօշակը, փորձելով հարուածել տղոցմէ մէկը։ Ան սկսած է հայհոյել, սակայն այդ պահուն ոստիկանները հասած եւ ձերբակալած են գազանաբարոյ անձը։