Ֆրանսական հեռատեսիլի LCI լրատու կայանէն, Յունուար 20-ին լրագրողուհի Քաթրին Ժանթիլ արդար մօտեցումով եւ խիզախօրէն զեկուցեց Բերձորի միջանցքի խափանումով ստեղծուած մարդասիրական ճգնաժամին մասին։ 

Արդար ու խիզախ նման զեկուցումներ նոյնիսկ եթէ բան չեն փոխեր այս օրերուն սովորական առօրեայի մը բոլոր փուլերուն տանջուող Արցախի խեղճ բնակչութեան տառապանքէն, բայց եւ այնպէս, պճեղ մըն ալ ըլլայ՝ կը տաքցնեն գոնէ սրտերը։

Լրագրողուհին ամէնէն անտեղեակներուն բացատրելէ ետք Բերձորի միջանցքին կենսական կարեւորութիւն հաղորդող հանգամանքները, կարճ տեսանիւթերով ցոյց տուաւ Արցախի այլեւս բոլորովին դատարկ խանութները, հիւանդանոցներու ծանր վիճակը, անցքը խափանող ազերպայճանցի «բնապահ»-ները, եւ յիշելէ ետք, թէ կառքերու վառելանիւթ  այլեւս չէ մնացած, կազն ու ելեկտրականութիւնն ալ խզուած են, մինչ ջերմաստիճանը իջած է մինչեւ -8, հարց տուաւ, թէ ո՞ր տրամաբանութեամբ կարելի է ըմբռնել, որ այդ «բնապահ»-ներուն արարքը կրնայ յանգեցնել Արցախի ամբողջ բնակչութեան համար աղէտալի նման վիճակի, եթէ ոչ՝ Պաքուէն եկած հրահանգները։

Լրագրողուհին բազմիցս կրկնելով, թէ Ալիեւ բռնապետ մըն է, նոյնիսկ Փութինէն տասն անգամ աւելի բիրտ բռնապետ մը՝ դատելով մարդկային իրաւանց միջազգային կազմակերպութիւններու տեղեկագրերէն, քննադատեց միջազգային հանրութեան  այս մութ կէտին աչք փակելը, մարդասիրական նման ծաւալի աղէտի մը նկատմամբ անտարբեր մնալը, միայն իր շահերը հետապնդելը, ասոր իբր խօսուն օրինակ ալ բերելով Ուրսուլա վոն տեր Լայէնի՝ Ազերպայճանի նկատմամբ արտայայտած այլեւս նշանաւոր՝ «վստահելի գործընկեր»-ի դրուագը։    

Լրագրողուհին շեշտը դնելու համար, որ Պաքու ամէն ինչ կը փորձէ ձեռք ձգել զանազան ձեւի կաշառումներով, յիշեց նաեւ Վատիկանի մէջ ձեռնարկուած պեղումներուն  Ազերպայճանի կողմէ գանձատրումը, եզրափակելու համար, որ այդ ձեւով Ալիեւի վարչակարգը կը փորձէ սիրաշահիլ քրիստոնեայ հանրութիւնը, զայն քաշել իր կողմը, ընդդէմ քրիստոնեայ Հայուն։