Հայաստանի ճատրակի աղջկանց առաջնութեան ախոյեան Մարիամ Մկրտչեան աշխարհի մինչեւ 18 տարեկաններու ախոյեանութեան տիրանալէ ետք, այժմ նաեւ ոսկէ մետալակիր դարձած է Եւրոպայի նոյն տարիքի դասակարգի առաջնութեան:

Մկրտչեան Թուրքիոյ Անթալիա քաղաքին մէջ ընթացող Եւրոպայի պատանեկան առաջնութեան նախավերջին՝ 8-րդ շրջանին յաղթած է իռլանտացի Թրիշա Գանյամարալայի եւ մրցաշարքի աւարտէն առաջ իսկ նուաճած է Եւրոպայի ախոյեանի տիտղոսը:

Եզրափակիչ շրջանէն առաջ Մարիամ իր միաւորներու թիւը հասցուցած է 7,5-ի եւ անհասանելի դարձած մրցակիցներուն համար։

Հայաստանի ներկայի ախոյեան Մարիամ Մկրտչեան այս տարի նախապէս ալ նուաճած էր աշխարհի Մ18 տարեկաններու ախոյեանի կոչումը՝ շահելով իր 11 մրցումներն ալ։