Պաքուի բռնապետ Իլհամ Ալիեւ Ակնայի (Աղդամ) Մուղամ կեդրոնի բացման արարողութեան ընթացքին յայտարարած է, թէ բոլոր անոնք որոնք «այսօր հաշուի չեն առներ Ազերպայճանը, վաղը պիտի զղջան»։

Ան 44-օրեայ պատերազմի յաղթանակը ազերի ժողովուրդի հասարակաց յաղթանակ որակած է եւ նշած է թէ իր երկիրը այդպէսով «ցոյց տուած է իր պատմական մեծութիւնը ամբողջ աշխարհին»։ 

«Պատահական չէ որ նոյնիսկ մեզի թշնամի շրջանակները, ուժերը եւ երկիրները գիտեն թէ մենք արժանապատիւ եւ յարգանքի արժանի ժողովուրդ ենք եւ որուն հետ հաշուի պէտք է նստիլ։ Անոնք որոնք մեզ կ՚անտեսեն այսօր, գոնէ մեր տարածաշրջանին մէջ, վաղը պիտի զղջան»,– ընդգծած է բռնապետը։

Անոր համաձայն, պատերազմի ընթացքին Պաքու յստակօրէն հասկցած է «թէ ով կը սատարէր Հայաստանին եւ ինչ ուժեր կը գտնուէին անոր ետին», բայց այդ պարագան չէ կասեցուցած իր ընթացքը։