Ան միւսներուն ալ կոչ ըրած է հետեւելու իր օրինակին

Ամերիկացի նշանաւոր տիեզերագնաց Կարեթ Ռեյզմէն կը հրաժարի մասնակցելէ Պաքուի մէջ կայանալիք Միջազգային տիեզերագնացութեան համաժողովին։ Այս կապակցութեամբ ան քանի մը անգամ հաղորդած է Թուիթըրի իր էջին տեղադրած գրառումներով, արձագանգելով Տիեզերագնացութեան միջազգային դաշնակցութեան յայտարարութեան (IAF)՝ Պաքուի համաժողովին մասնակցելու վերաբերեալ։

«Ինչո՞ւ Միջազգային տիեզերագնացութեան (IAC) ժողովը տեղի կ՚ունենայ Ազերպայճանի մէջ, այդ երկիրը յանցաւոր է՝ իր դրացի Հայաստանի դէմ կատարած վերջին ռազմական գործողութեան համար։ Ազերպայճան ամէնէն եղծանուած երկիրներէն է եւ Եւրոպայի մէջ ունի մարդկային իրաւանց ամէնէն գէշ ցուցանիշերէն մէկը։

Ես պիտի չմասնակցիմ ժողովին, իսկ մասնակցողներէն կը խնդրեմ վերանայիլ իրենց որոշումը»,– գրած է Ռեյզմէն, իր թուիթըրեան էջին տեղադրելով Freedom House-ի, «Լրագրողներ առանց սահմանի» (Reporters sans frontières), «Transparency International»-ի զեկոյցները՝ նշելով. «Ռազմական յարձակումը սկսած է անցնող Սեպտեմբերին եւ դատապարտուած Եւրոպական խորհրդարանին կողմէ։ Freedom House-ի վերջին զեկոյցին մէջ Ազերպայճան քառակողմ կապի մէջ է Ռուսաստանի, Թիւրքմէնստանի եւ Ուզպէքստանի հետ՝ իբրեւ Եւրոպայի եւ Կեդրոնական Ասիոյ ամէնէն եղծանուած երկիրները։

“Լրագրողներ առանց սահմանի” կազմակերպութիւնը մամլոյ ազատութեան դասաւորման մէջ 180 երկիրներու շարքին Ազերպայճանը դասած է 154-րդ տեղը (ընդամէնը մէկ տեղ առաջ Ռուսաստանէն, կը շնորհաւորեմ Ազերպայճանը)։

“Transparency International”-ը Ազերպայճանը դասած է 128-րդ տեղը 180 երկիրներու մէջ՝ իրենց ներկայի եղծանման ընկալման համաձայն, կրկին Ռուսաստանէն ընդամէնը մէկ տեղ բարձր»,– գրած է ամերիկացի տիեզերագնացը։

Նշենք, թէ Միջազգային տիեզերագնացութեան համաժողովը տեղի կ՚ունենայ Պաքուի մէջ, յառաջիկայ Հոկտեմբերին։