Արցախի Հանրապետութեան Ազգային ժողովի խմբակցութիւնները, արտայայտելով ժողովուրդի կամքն ու դիրքորոշումը, կը պահանջեն Հայաստանի Հանրապետութեան իշխանութիւններէն հաւատարիմ մնալ Հայաստանի Գերագոյն խորհուրդի 1992 Յուլիս 8-ի որոշումին եւ կասկածի տակ չդնել Արցախի ժողովուրդի ինքնորոշման իրաւունքը:
Ստորեւ՝ այս կապակցութեամբ Մարտ 13-ին հրապարակուած յայտարարութիւնը, ստորագրուած «Ազատ հայրենիք», «Միասնական հայրենիք», «Արդարութիւն», «ՀՅԴ» եւ «Արցախի ժողովրդավարական կուսակցութիւն» խմբակցութիւններուն կողմէ.
«Մի քանի օրից կը լրանայ Արցախի Հանրապետութեան 120 հազար բնակչութիւնը Ադրբեջանի կողմից շրջափակելու 100 օրը: Արհամարհելով Արցախի ապաշրջափակման վերաբերեալ Լա Հէյի միջազգային դատարանի որոշումը` Ադրբեջանի ղեկավարութիւնը ուժի սպառնալիքով եւ կիրառմամբ շարունակում է Արցախը հայաթափելու քաղաքական ուղեգիծը:
Արցախի Հանրապետութիւնն իրեն բռնակցելու մտադրութեան մէջ Ադրբեջանը չի խորշում հակամարդկային միջոցներից եւ ահաբեկչական գործողութիւններից: Բնական կազի եւ ելեկտրական ուժանիւթի մատակարարման խափանումները, խաղաղ բնակչութեան ահաբեկումն ու ազատ տեղաշարժի սահմանափակումները, իսկ վերջերս էլ՝ Մարտ 5-ին, իրենց ծառայողական պարտականութիւնները կատարելու ժամանակ ոստիկաններին գնդակահարելու փաստը գալիս են ապացուցելու, որ նման պայմաններում անընդունելի են ուղիղ երկխօսութեան մասին խօսակցութիւնները:
Միեւնոյն ժամանակ, համոզուած ենք, որ Արցախեան հակամարտութիւնը, որպէս միջազգային օրակարգի հարց, պէտք է լուծուի բանակցութիւնների միջոցով համապատասխան միջազգային կառոյցների միջնորդութեամբ ու երաշխիքներով, մասնաւորապէս, այդպիսի լիազօրութեամբ օժտուած Մինսկի խմբի համանախագահ երկրների ներգրաւմամբ:
Ադրբեջանի ռազմաքաղաքական ղեկավարութիւնը քարոզչական տարբեր հնարքներով ապատեղեկացնում է սեփական հանրութիւնն ու միջազգային կառոյցները՝ նպատակ ունենալով Արցախի ժողովրդի դէմ կիրառուող մարդասիրական ճնշումների եւ ահաբեկումների պայմաններում պատրանք ստեղծել “խաղաղութեան դարաշրջան”-ի մասին:
Արցախի Հանրապետութեան Ազգային ժողովի խմբակցութիւնները, արտայայտելով ժողովրդի կամքն ու դիրքորոշումը, պահանջում են Հայաստանի Հանրապետութեան իշխանութիւններից հաւատարիմ մնալ Հայաստանի Գերագոյն խորհրդի 1992 Յուլիս 8-ի որոշմանը եւ կասկածի տակ չդնել Արցախի ժողովրդի ինքնորոշման իրաւունքը:
Արցախի խորհրդարանի բոլոր խմբակցությունները վերահաստատում են իրենց հաւատարմութիւնը մեր ժողովրդի կամքն արտայայտող հիմնարար փաստաթղթերին եւ շարունակելու են առաջնորդուել դրանցից բխող գաղափարներով եւ սկզբունքներով»:
