Արցախի Հանրապետութեան նախագահ Արայիկ Յարութիւնեան յայտնած է, որ Ապրիլ 23-ին գումարուած Ապահովութեան խորհուրդի հրատապ նիստին մասնակցող բոլոր անդամները միաձայնութեամբ ընդունած են հետեւեալ յայտարարութիւնը.

«Ընդգծելով, որ Արցախի ամբողջ ժողովուրդը ժամանակին հաւատացել է 2020 Նոյեմբեր 9-ի եռակողմ յայտարարութեան եւ Ռուսաստանի կողմից տրամադրուած անվտանգութեան երաշխիքներին եւ վերադարձել Հայրենիք ու անցել բնականոն կեանքի կազմակերպմանը,

Շեշտադրելով, որ եռակողմ յայտարարութեան ստորագրումից ի վեր Ադրբեջանը բազմաթիւ անգամ խախտել է տուեալ փաստաթղթի տարբեր դրոյթներ՝ սպանելով Արցախի բնակիչների, բռնագրաւելով նոր տարածքներ, իսկ 2022 Դեկտեմբեր 12-ից՝ արդէն 133 օր շարունակ Արցախի ժողովրդին պահելով շրջափակման, 104 օր շարունակ՝ էլեկտրամատակարարումից, իսկ 67 օր շարունակ՝ կազամատակարարումից զուրկ պայմաններում,

Ողջունելով Ռուսաստանի ղեկավարութեան կողմից բազմիցս արտայայտուած դիրքորոշումը՝ Արցախի ժողովրդի անվտանգութեան երաշխիքների շարունակութեան ու ամրութեան, ինչպէս նաեւ Բերձորիի միջանցքում ադրբեջանական անցակէտի տեղադրման անընդունելիութեան վերաբերեալ, 

Բացարձակօրէն անընդունելի համարելով Արցախը Հայաստանի հետ կապող՝ Ռուսաստանի խաղաղապահ զօրակազմի պատասխանատւութեան տիրոյթում գտնուող Բերձորի միջանցքի փակումը եւ Ապրիլ 23-ին այնտեղ անցակէտի տեղադրումը Ադրբեջանի կողմից, 

Արձանագրելով, որ այդ քայլով Արցախի ժողովուրդը վերջնականապէս դարձել է պատանդ Ադրբեջանի ձեռքում՝ ցեղային զտման աճող վտանգով, իսկ եռակողմ յայտարարութեան հետագայ գործունէութիւնը լրջօրէն վտանգուած է՝ 

Դիմում ենք եռակողմ յայտարարութեան կողմերին եւ յատկապէս Ռուսաստանի Դաշնութեան՝ անյապաղ քննարկումներ սկսելու Արցախի շրջափակման վերացման, ադրբեջանական անցակէտի տեղադրման կանխարգելման եւ Արցախի ժողովրդի անվտանգութեան իրական երաշխիքների ապահովման շուրջ։ Ակնկալում ենք ամենակարճ ժամկէտում գործուն քայլեր Արցախի ժողովրդի առջեւ ծագած անվտանգային եւ մարդասիրական հիմնախնդիրների լուծման ուղղութեամբ, որոնց բացակայութիւնը թոյլ կը տայ Արցախի իշխանութիւններին ու ժողովրդին որոշելու իրենց հետագայ անելիքները»։