Մայիս 22-ին, տեղի ունեցած է Հայ-չինական Երկրաշարժաչափական եւ GNSS ցանցային կեդրոնի բացման արարողութիւնը, Գիւմրիի «Ա. Նազարով» Երկրաշարժաբանութեան հիմնարկին մէջ:

Սոյն կեդրոնը պիտի ամրապնդէ երկու երկիրներուն միջեւ գործակցութիւնը՝ երկրաշարժական հսկողութեան եւ վտանգի գնահատման բնագաւառին մէջ:

Չինացի փորձագէտներ դաշտային ուսումնասիրութիւններ կատարած եւ ընտրած են երկրաշարժական կայաններուն համար ամէնէն յարմար վայրը:

“Այսպիսի բարդ կայաններ շրջանին մէջ հազուագիւտ են”,– ըսած է Հիմնարկի տնօրէն Ջոն Կարապետեան, աւելցնելով թէ կայանները ի վիճակի են արձանագրելու երկրաշարժեր 15.000 քիլոմեթր շառաւիղի մէջ: “Առաջին անգամ կ՚օգտագործուի կանխազգուշացման համակարգ, որ հնարաւորութիւն կ՚ընձեռէ ստանալու երկրաշարժերու մասին տուեալներ երկվայրկեաններու ընթացքին”,– աւելցուցած է ան:

Բացման արարողութեան ներկայ գտնուած է Հայաստանի մէջ Չինաստանի դեսպան Լի Ցինուէյ։