Նահատակուած զինուորներու հարազատները Նիկոլ Փաշինեանը Եռաբլուրի մէջ դիմաւորած են «թուրք», «դաւաճան», «հայասպան» վանկարկումներով
Հայաստանի վարչապետ Նիկոլ Փաշինեան, Բանակի օրուան առիթով նախարարներու եւ իշխանութեան խմբակցութեան երեսփոխաններու ուղեկցութեամբ, Յունուար 28-ի առաւօտեան այցելած է «Եռաբլուր» զինուորական պանթէոն:
Նահատակուած զինուորներու ծնողները Նիկոլ Փաշինեանը դիմաւորած են զինք «թուրք», «հայասպան», «դաւաճան» անուանելով:
NEWS.am-ի թղթակիցը Եռաբլուրէն կը հաղորդէ, որ բանակի օրուան նուիրուած արարողութիւնը, ինչպէս 44-օրեայ պատերազմէն ետք Նիկոլ Փաշինեանի մասնակցութեամբ Եռաբլուրի մէջ բոլոր միջոցառումները, փակ է լրասփիւռներու համար:
Առտուան ժամը 6-էն ոստիկանութիւնը մեծ թիւով ուժեր, կարմիր ու սեւ բերետաւորներ կեդրոնացուցած է Նիկոլ Փաշինեանի այցելութեան ընդառաջ։ Նոյնիսկ պանթէոնի ներքեւի հատուածին մէջ հանրակառքերով բազմաթիւ ոստիկաններ տեղակայուած են:
Այնտեղ եղած են նաեւ նահատակուած զինուորներու ծնողները, որոնք կանգնած են իրենց որդիներու շիրիմներուն քով՝ թոյլ չտալու, որ պաշտօնեաները մօտենան իրենց որդիներու շիրիմներուն:
