Յուլիս 14-ին, Հայաստանի Արտաքին գործոց նախարար Արարատ Միրզոյեան Լիզպոնի մէջ հանդիպում ունեցած է «Գալուստ Կիւլպէնկեան» հիմնարկութեան հոգաբարձուներու խորհուրդի նախագահ Անթոնիօ Ֆեյժոյի հետ, մասնակցութեամբ Հայ համայնքներու բաժանմունքի տնօրէն Ռազմիկ Փանոսեանի։
Ան բարձր գնահատած է «Կիւլպէնկեան»-ի մեծ ներդրումը աշխարհասփիւռ հայ համայնքներուն՝ հայապահպանութեան եւ հայագիտութեան զարգացման գործին մէջ։ Նախարարը ընդգծած է նաեւ Հիմնարկութեան դերը իբրեւ բացառիկ կամուրջ՝ երկու պետութիւններու միջեւ կապերու սերտեցման առումով:
Հանդիպումին քննարկուած են գիտութեան, կրթութեան, մշակոյթի, ինչպէս նաեւ տեղեկատուական արհեստագիտութիւններու բնագաւառներուն մէջ հայաստանեան կառոյցներու եւ «Կիւլպէնկեան»-ի համագործակցութեան հետագայ ընդլայնման կարելիութիւնները, այս եւ նոր ուղղութիւններով միատեղ ծրագրերու իրագործման հեռանկարները: Ընդգծուած է պատմամշակութային արժէքներու պահպանման գծով շարունակական ջանքերու գործադրման կարեւորութիւնը։
Աւարտին, Միրզոյեան այցելած է «Կիւլպէնկեան» թանգարանը եւ ծանօթացած հոն ներկայացուած արուեստի գործերու հարուստ հաւաքածոյին, որ կը ներառէ նաեւ հայկական բացառիկ նմուշներ։
