«Սիրելի՛ հայրենակիցներ Հայաստանում, Արցախում և Սփիւռքում,

Աւարտւում է 2021 թուականը՝ մեր ժողովրդի, Հայաստանի ու Արցախի համար բարդագոյն ևս մէկ տարի, պատերազմի հետևանքների և համավարակի դժուարին մի ժամանակաշրջան:

Իմ խորին յարգանքը՝ իրենց կեանքը հայրենիքին զոհաբերած մեր զաւակների անմար յիշատակին: Ձեզ հետ միասին կիսում եմ այդ խորը վիշտը:

Ցաւակցում եմ նաև համավարակին զոհ գնացած մեր բազմաթիւ հայրենակիցների ընտանիքներին և հարազատներին։

Առողջութիւն եմ մաղթում բոլոր վիրաւորներին ու հիւանդներին:

Շարունակելու եմ իմ միջազգային ջանքերը՝ գերութեան մէջ գտնուող մեր բոլոր հայրենակիցների շուտափոյթ վերադարձի և անհետ կորածների յայտնաբերման համար:

Սիրելի՛ հայրենակիցներ, 30 տարի առաջ այս օրերին մենք Ամանորը առաջին անգամ նշում էինք որպէս Հայաստանի անկախ հանրապետութեան քաղաքացիներ: 30 տարիները նշանաւորուեցին թէ՛ ձեռքբերումներով ու յաղթանակներով և թէ՛, ցաւօք, նաև` կորուստներով։

Այսօր մեր երկիրը կրկին գտնւում է լրջագոյն փորձութիւնների և մարտահրաւէրների առջև:

Մեզ պէտք է կամք՝ յաղթահարելու այդ փորձութիւնները։

Պէտք է ունենանք նաև յստակ տեսլական և ծրագիր, լինենք ազնիւ և պատասխանատու:

Անհրաժեշտ է ազգային ինքնութեան և պետականութեան խոր գիտակցում: Ինքնութիւնը պետութեան անձնագիրն է, իսկ պետութիւնը՝ ազգային ինքնութեան երաշխաւորը:

Պէտք է դառնանք մրցունակ երկիր՝ օգտագործելով մեր համաշխարհային մեծ ներուժը:

Հետևաբար, անհրաժեշտ է բացել Հայրենիքի դռները մեր բոլոր հայրենակիցների համար:

Իսկ դրա համար նախ պէտք է փոխենք Սահմանադրութիւնը, որպէսզի Սփիւռքի մեր հայրենակիցները, մեր ողջ ժողովուրդը կարողանան ազատօրէն մաս կազմել և ծառայել Հայրենիքին:

Սահմանադրութեան փոփոխութիւնը կը նպաստի նաև պետութեան աւելի արդիւնաւէտ կառավարմանը, պետական կառոյցների հաւասարակշռմանը, աւելի ճկուն ու փոխկապակցուած, աւելի հասկանալի ու պատասխանատու գործունէութեանը:

Վաղուց ժամանակն է գիտակցել, որ մեր ամենաուժեղ զէնքը մենք ենք՝ մեր բանակը, մեր աշխատանքը, մեր միտքը:

Ժամանակն է՝ դառնալու պետութի՛ւն, որին հաւատում ու վստահում են, որը յուսալի պատուար է իր իւրաքանչիւր քաղաքացու համար, որի շուրջը համախմբւում ենք բոլորս:

Ես իսկապէս հաւատում եմ, որ կարող ենք միասին կառուցել մեր ապագան։

Հաւատացէ՛ք ձեր ուժերին, յարգե՛նք մեր երկիրը, յարգե՛նք իւրաքանչիւր հայրենակցի: Եւ աշխարհն աւելի կը յարգի մեզ՝ որպէս ժողովուրդ և որպէս պետութիւն:

Սիրելի՛ հայրենակիցներ,

Ամանորը յոյսի, հաւատի ու սպասումների տօն է: Վստա՛հ եմ, որ կարող ենք յաղթահարել այսօրուայ մարտահրաւէրները: Վստա՛հ եմ, որ կարող ենք ամուր և անխոցելի սահմաններով, կայուն ու խաղաղ, բարեկեցիկ ու արժանապատիւ երկիր դառնալ:

Հաւատո՛ւմ եմ, որ կարող ենք միասին կառուցել ուժեղ Հայաստան: Տեսնու՛մ եմ այդ ճանապարհը:

Թող 2022 թուականը մեր երկրի, մեր ժողովրդի, ձեզնից իւրաքանչիւրի և ձեր ընտանիքների համար լինի առողջութեան, խաղաղութեան, յաջողութեան, լիութեան և առաջընթացի տարի:

Թող բոլորիս ընտանիքներում տիրեն ջերմութիւնը, համերաշխութիւնը, ուշադրութիւնը, հոգատարութիւնը և սէրը միմեանց հանդէպ:

Շնորհաւոր Նոր տարի»: