Յետ երկարատեւ հիւանդութեան, 58 տարեկանին իր մահկանացուն կնքած է ծանօթ լրագրող, հրապարակախօս, գրող Վահան Իշխանեան: Մահուան բօթը Դիմագիրքի իր էջով տեղեկացուցած է լրագրողուհի Ռուզան Խաչատրեան:

«Դժուար, բարդ, բայց եւ ազնիւ, սկզբունքային, խորը մարդ։ Վահան Իշխանեան, հանգչիր խաղաղութեամբ…»,– գրած է ան։

Լրագրողներու միութեան նախագահուհի Սաթիկ Սեյրանեան եւս իր էջին ցաւակցութիւն  յայտնած է Վահան Իշխանեանի մահուան կապակցութեամբ․ «Լոյսերու մէջ մնաս, Վահան ջան…. Շատ ցաւալի լուր: Փայլուն հրապարակախօս, լրագրող, գրող Վահան Իշխանեան ջան, իմ առաջին գլխաւոր խմբագիր»:

Վահան Իշխանեան ծնած է 1964-ին Երեւան: Աշխատակցած է շարք մը տպագիր եւ ելեկտրոնային թերթերու, եղած է խմբագիր եւ թղթակից: Համախոհներու հետ հիմնադրած է Ինքնագիր գրական ակումբը:

Իր հեղինակած կամ համահեղինակած գիրքերն են.- «Ռուսուլմանի նօթեր» (2017), «Ովքեր են նրանք. հայախօս, մուսուլման համշէնցիները» (2014), «Համայնք եւ երկիր. Հայաստանում խղճի ազատութեան ուսումնասիրութիւն» (համահեղինակ / 2014), «Անմազ» (պատմուածքներու ժողովածոյ / 2010), «Կրօնի ազատութիւնը Հայաստանում» (համահեղինակ /  2010), «Հաշուեյարդար. հալածանք եւ դիմադրութիւն» (2004), «Deviation: Anthology of Contemporary Armenian Literature» (համահեղինակ / 2008), «Makukachu: Anthology of Contemporary Armenian Literature» (համահեղինակ / 2016)։

Ան կողակիցն էր ծանօթ բանաստեղծուհի Վիոլէթ Գրիգորեանի։