Ապրիլ 14-ի երեկոյեան, Պուշ-տիւ-Ռոնի Նահանգային խորհուրդի շէնքի ճակատին պարզուած է հսկայական պաստառ մը, Հայոց ցեղասպանութեան 108-րդ տարելիցին առթիւ, պաշտօնական արարողութեան ընդառաջ։
Իսկ Երկուշաբթի, Ապրիլ 17-ին, Նահանգի եւ Էքս-Մարսէյլ-Փրովանս մեթրոփոլի նախագահուհի Մարթին Վասալ իր նախաձեռնութեամբ, նոյն շէնքին մէջ, բազմաթիւ հիւրերու ներկայութեան տեղի ունեցած ոգեկոչման պաշտօնական արարողութեան՝ պաշտօնապէս բացումը կատարած է պաստառին։ Արարողութեան ներկայ եղած են ի շարս բազմաթիւ այլ անձնաւորութիւններու, Մարսիլիոյ մէջ Հայաստանի նորանշանակ հիւպատոս տիկին Մատլէն Պռոշեան, Հարաւային CCAF-ի համանախագահներ՝ Ժիւլիէն Հարունեան, Ազատ Պալալաս-Գազանճեան, հայկական կազմակերպութիւններու մեծ թիւով ներկայացուցիչներ։
