Յայտնի են «Ոսկէ ծիրան» շարժանկարի փառատօնի միջազգային մրցոյթի այս տարուան դատակազմի անդամները:

Ցանկին մէջ են Սան Սեպասթիանի եւ Թորինոյի փառատօներու մասնակից, Ոսկէ ծիրանի դափնեկիր, ամերիկահայ բեմագիր եւ բեմադիր Էրիկ Նազարեան, յունական Նոր ալիքի համահիմնադիր, նշանաւոր «Աթենպերկ» ֆիլմի բեմադիր, ինչպէս նաեւ Աթէնքի ողիմպիական խաղերու հանդիսաւոր արարողութիւններու բեմադիր Աթինա Ռաշէլ Ցանկարի։ 

Միջինասիական ժամանակակից շարժարուեստի ամենավառ հեղինակներէն մէկը՝ ժանրային փորձարարութեան եւ հեգնական մռայլութեան վարպետ Ատիլխան Երժանով նոյնպէս դատակազմի անդամներէն է։

Միւս անդամը Ատա Սոլոմոնն է՝ ռումանական շարժանկարի առաջատար արտադրողներէն մէկը, Պերլինի շարժանկարի փառատօնի Ոսկէ արջի դափնեկիր եւ Օսքարի թեկնածու ներկայացուած ֆիլմերու արտադրող։

Նշենք, թէ Երեւանի «Ոսկէ ծիրան» 22-րդ միջազգային շարժանկարի փառատօնի մրցոյթի դատակազմի նախագահն է Գաննի շարժանկարի փառատօնի եւ Սեզարի մրցանակակիր, մաւրիտանացի վարպետ Ապտերահման Սիսաքօ։ 

«Ոսկէ ծիրան» 22-րդ միջազգային փառատօնը տեղի կ՚ունենայ Յուլիս 13-20։ Այս տարի եւս հանրութեան պիտի ներկայացուին մրցութային ֆիլմեր աշխարհի տարբեր երկիրներէն, ինչպէս նաեւ ամենահեղինակաւոր (Գանն, Պերլին, Վենետիկ եւ այլն) փառատօներէն։ Հայաստան պիտի ժամանեն շարժարուեստի համաշխարհային դէմքեր, որոնք իրենց փորձառութիւնն ու արուեստը պիտի ներկայացնեն շարժանկարի սիրահարներուն։