Արցախի նախկին Պետական նախարար Ռուբէն Վարդանեան անդրադառնալով Ազերպայճանի Մարտ 5-ին կատարած ռազմական գործողութեան հաղորդած է հետեւեալը.

«Ես բազմիցս եմ նշել, որ իրենց առաջարկած “համարկումը” մեզ համար չի կարող ընդունելի լինել, քանի որ դա նշանակում է, որ Արցախում Հայ չի կարող ապրել: Ալիեւեան վարչակազմը ամէն օր ապացուցում է, որ իր նպատակը մեզ այստեղից հեռացնելն է, մեզ մեր հայրենիքից զրկելն է: Նրանք այդ նպատակին հասնելու համար ունակ են դիմել որեւէ քայլի: Այսօրուայ դէպքերը դրա վառ ապացոյցն են:

Կարեւոր է, որ Սպարապետ Վազգէն Սարգսեանի ծննդեան օրը վերյիշենք նրա խօսքերը ուղղուած մեզ: Դրանք աւելի արդիական են այսօր, քան երբեւէ: Նա ասել է. “Ես ատում եմ մազապուրծ բառը, ես չեմ ուզում մազապուրծ լինել, ես չեմ ուզում եւս մէկ անգամ իմ հայրենակիցներին, հարազատներին սրի տան… Եւ, փառք Աստծոյ, մեր ժողովուրդն իր մէջ այդ զոհի հոգեբանութիւնը յաղթահարեց: Այդ իմաստով մենք այս պատերազմը պիտի շատ յարգենք, ընդհանրապէս ղարաբաղեան ազատամարտը, Ղարաբաղի ժողովրդին մենք պիտի շատ յարգենք: Այս ազատամարտը մեզ ստիպեց, որ ինքներս մեզ յարգենք: Սա մեր պատերազմն է: Սիրենք թէ չսիրենք,– պատերազմ ոչ ոք չի սիրում,– բայց պարտաւոր ենք յարգել, առանց դրա մենք հեռանկար չենք ունենայ…”:

Սրանք իսկական առաջնորդի խօսքեր են, ում համար իր ժողովրդի արժանապատիւ կեանքը վեր է ամէն ինչից։

Պատասխանատւութիւն ստանձնած մեր ղեկավարները պէտք է գիտակցեն, որ չի կարելի մեր ազգային արժանապատւութեան հաշուին յարմարուել։ Մեր հայրենիքի անվտանգութիւնը հնարաւոր է ապահովել միայն մեր կամքի ու ուժի շնորհիւ։

Պայքարի ու դիմադրութեան այլընտրանքը մազապուրծ ու հայրենազուրկ դառնալն է, իսկ դա մենք թոյլ տալ չենք կարող»,– Դիմագիրքի իր էջին գրած է Ռուբէն Վարդանեան։