Սալցպուրկի համալսարանի Քրիստոնեայ արեւելքի հետազօտութիւններու կեդրոնը, որ 2013-էն հայագիտութեան ուսումնասիրութիւններու նպատակով կը գանձատրուի նաեւ Հայաստանի Կրթութեան, գիտութեան, մշակոյթի եւ մարզանքի նախարարութեան կողմէ, հայագէտ Եասմին Տում-Թրակութի ղեկավարութեամբ,– Արցախի հոգեւոր-մշակութային ժառանգութեան նուիրուած դրամաշնորհային առաջին մրցոյթի ծիրին մէջ,– հետազօտական հինգ դրամաշնորհ տրամադրած է երիտասարդ գիտնականներուն։ Լուրը կը հաղորդէ Կրթութեան, գիտութեան, մշակոյթի եւ մարզանքի նախարարութիւնը, նշելով, թէ դրամաշնորհային ծրագիրը գանձատրած է Սալցպուրկի արքեպիսկոպոսական թեմը:
Կարճաժամկէտ դրամաշնորհներու այս ծրագիրը նպատակ ունի խրախուսելու Արցախի (քրիստոնէական) պատմութեան, մշակոյթի, հնագիտութեան, արուեստի, ինչպէս նաեւ պատմամշակութային յուշարձաններու վերաբերեալ երիտասարդ գիտնականներու հետազօտութիւնները, նպաստելու հայկական մշակութային ժառանգութեան ուսումնասիրութեան։
Խրախուսուած հինգ հետազօտութիւններն ալ Հայաստանէն են, որոնք կը ներկայացնեն գիտահետազօտական տարբեր հաստատութիւններ, ինչպէս նաեւ Մայր Աթոռ Սուրբ Էջմիածինը: Անոնք են՝
– Նժդեհ Երանեան, գիտաշխատող, «Արցախի Ք.ա. 3-րդ – առաջին հազարամեակի սկիզբի մշակոյթը՝ ըստ թանգարանային նիւթերու»։
– Հայր Աթանաս աբեղայ Սարգսեան, Մայր Աթոռ Սուրբ Էջմիածին, Հռոմի պապական արեւելեան հիմնարկ, «Քրիստոնէական ընկալումները արցախահայ բանահիւսութեան մէջ»։
– Շողակաթ Դեւրիկեան, գիտաշխատող, «Հայկական մանրանկարչութեան ընդհանուր օրինաչափութիւնները եւ տեղական իւրայատկութիւնները՝ Արցախի նկարազարդուած Աւետարաններու տէրունական պատկերներու մէջ»։
– Ովսաննա Խաչատրեան, գիտաշխատող, «Արցախի մէջ գրուած ձեռագրերու յիշատակարանները՝ որպէս պատմամշակութային կարեւոր սկզբնաղբիւր»։
– Աշոտ Մկրեան, Հայոց ցեղասպանութեան թանգարանի աշխատակից, լեզուաբան, «Արցախի բարբառը Զմիւռնիոյ մէջ. հանրալեզուաբանական քննութիւն»:
Հետազօտական նախագծերը կ՚իրականացուին Սալցպուրկի համալսարանի հայագիտութեան բաժինին հետ սերտ համագործակցութեամբ եւ փորձագիտական ու գիտական խորհրդատւութեամբ։ Արդիւնքները գիտական զեկուցումներու եւ յօդուածներու ձեւով կ՚ամփոփուին յաջորդ տարեվերջին՝ նաեւ Սալցպուրկի համալսարանին կողմէ։
Արցախի հայկական մշակութային ժառանգութեան ուսումնասիրութեան նուիրուած կարճաժամկէտ դրամաշնորհներու ծրագիրը կը շարունակուի նաեւ 2023-ին: Սալցպուրկի համալսարանի հայագիտութեան բաժինը նպատակ ունի աջակցելու երիտասարդ հետազօտողներուն ու անոնց ստեղծարար գիտական ծրագրերուն, խրախուսելու հայագիտական, ինչպէս նաեւ մշակութային ժառանգութեան առնչուող հետազօտութիւններու միջառարկայնացումն ու միջազգայնացումը, նպաստելու Արցախի վտանգուած մշակութային ժառանգութեան պահպանութեան։
